Bu, xəyanətdir – İspaniyada baş nazirə qarşı şok ittiham
İspaniyanın sağçı “Voks” partiyasının lideri Santyaqo Abaskal ölkənin baş naziri Pedro Sançesi Seuta şəhərində yaşanan miqrant böhranına görə məsul tutub.
Crossmedia.az “El Debate” qəzetinə istinadən xəbər verir ki, Abaskal Seutaya daxil olan qeyri-qanuni miqrantların sayının 100 minə yaxın ola biləcəyini iddia edib.
Onun sözlərinə görə, böhrana görə ilk növbədə baş nazir Pedro Sançes cavabdehlik daşıyır. Abaskal hətta hökumətin fəaliyyətində cinayət məsuliyyəti elementlərinin ola biləcəyini bildirib və Konstitusiyanın 102-ci maddəsinə əsasən araşdırma başlanmasını tələb edib.
“Voks” lideri məsul şəxslər sırasında Avropa Komissiyasının rəhbəri Ursula fon der Lyayeni, Brüsseli və Mərakeşi də qeyd edib.
Abaskal Mərakeşi İspaniyanın suverenliyinə hörmət etməməkdə ittiham edib və Seuta sərhədinin hərbiləşdirilməsini təklif edib.
Qeyd edək ki, iyulun sonunda on minlərlə qeyri-qanuni miqrant Mərakeşdən Seutaya dəniz yolu və piyada keçidlərindən istifadə edərək daxil olmağa çalışıb. İspaniya hökuməti şəhərə təxminən 72 min miqrantın girdiyini, onlardan 70 minə yaxınının artıq Mərakeşə qaytarıldığını açıqlayıb. Hadisələr fonunda Madrid təhlükəsizliyin təmin olunması üçün hərbçiləri də cəlb edib.
12:55 09.08.2026
Oxunuş sayı: 59
