“Patriot” raketləri tükənir: ABŞ-nin və Ukraynanın eyni problemi
ABŞ-nin “Patriot” hava hücumundan müdafiə raketlərinin ehtiyatının azalması həm Vaşinqton, həm də Ukrayna üçün ciddi problemə çevrilib.
Crossmedia.az xəbər verir ki, “Tasnim News” bu barədə məlumat yayıb.
Məlumata görə, son aylarda ABŞ-nin “Patriot” zenit-raket kompleksləri üçün sursat ehtiyatı nəzərəçarpacaq dərəcədə azalıb. Bildirilir ki, buna İranla qarşıdurma zamanı raketlərdən intensiv istifadə səbəb olub.
Nəşr iddia edir ki, münaqişənin ilk günlərində Fars körfəzində bir ədəd “Şahed-136” pilotsuz uçuş aparatını vurmaq üçün səkkiz “Patriot” raketi buraxılıb. Bununla yanaşı, İran qüvvələrinin bölgədə bir neçə “Patriot” sistemini də məhv etdiyi iddia olunur.
“Tasnim News” yazır ki, raket çatışmazlığı Ukraynaya da təsir edib. Belə ki, Volodimir Zelenski ilə Donald Trampın son görüşündən sonra Ukraynada “Patriot” raketlərinin istehsal xəttinin yaradılması barədə məlumat yayılsa da, sonradan ABŞ-nin raket ehtiyatlarının kəskin azalması səbəbindən bu qərardan geri çəkildiyi bildirilir.
Məlumata əsasən, “Patriot” sistemlərinin raket ehtiyatlarının müharibədən əvvəlki səviyyəyə qaytarılması ən azı 2029-cu ilə qədər vaxt apara bilər.
Qeyd: Xəbərdə yer alan məlumatlar İranın “Tasnim News” agentliyinin yaydığı iddialara əsaslanır və müstəqil mənbələr tərəfindən təsdiqlənməyib.
15:42 06.08.2026
Oxunuş sayı: 54
