Xarici xəbərlər

İspaniyanın Seuta şəhərində 6 min qeydiyyatsız miqrant var

İspaniyanın Şimali Afrikadakı Seuta muxtar şəhərində təxminən 6 min qeydiyyata alınmamış miqrantın olduğu bildirilir.

Crossmedia.az xəbər verir ki, "El Mundo" bu barədə şəhər hökumətinin rəhbəri Xuan Xesus Vivasın açıqlamasına istinadən məlumat yayıb.

Nəşrin yazdığına görə, hüquq-mühafizə orqanları vəziyyəti nəzarətə almaq üçün qeyri-qanuni miqrantları, o cümlədən çimərliklərdə saxlayaraq Mərakeşə geri göndərməyə çalışırlar.

Məlumata əsasən, ispan polis əməkdaşları miqrantlardan ibarət qrupu Mərakeş sərhədi yaxınlığında yerləşən "Puerta de Europa" çimərlik barı istiqamətinə apararaq geri dönüş yolunu bağlayıblar. Miqrantlar bunu anlayandan sonra müxtəlif istiqamətlərə qaçıblar. Nəticədə yalnız bir nəfər saxlanılıb, digərlərinin axtarışı davam edir.

Qeyd edək ki, iyulun sonunda on minlərlə Mərakeş vətəndaşı qanunsuz yolla Seuta şəhərinə keçib. Buna İspaniya Ali Məhkəməsinin qanunsuz miqrantların dərhal ölkədən çıxarılmasını qadağan edən və onlara sığınacaq üçün müraciət etmək imkanı verilməsini tələb edən qərarı səbəb olub.

🖨 Çap et

17:06 05.08.2026

Oxunuş sayı: 42