İspaniyada 50 min nəfərlik miqrant axın Avropanı qarşı-qarşıya qoyub
İspaniyanın Afrikanın şimal sahilində yerləşən Seuta muxtar şəhərində kütləvi qanunsuz miqrant axını ciddi böhrana səbəb olub.
Crossmedia.az bu barədə xarici mediaya istinadən xəbər verir.
Məlumata görə, qısa müddət ərzində şəhərə təxminən 50 min miqrant daxil olub, daha 100-ə yaxın insan isə Seuta sahillərinə çatmağa çalışarkən həyatını itirib.
Əhalisi 80 mindən bir qədər çox olan şəhərdə miqrant axını ciddi gərginlik yaradıb. Təhlükəsizlik narahatlıqları səbəbindən bəzi mağazaların bağlandığı bildirilir. İspaniyanın Baş naziri Pedro Sançes hadisəni ölkənin ərazi bütövlüyü və suverenliyinin pozulması kimi qiymətləndirib.
Madrid Avropa İttifaqı (Aİ) ölkələrindən həmrəylik gözləsə də, bir sıra Avropa hökumətlərinin reaksiyası İspaniyada narazılıq yaradıb. İtaliya hətta İspaniyanın Şengen zonasına üzvlüyünün dayandırılması məsələsini gündəmə gətirib.
Sançes Avropa institutlarının rəhbərlərinə məktub göndərərək bəzi ölkələrin böhrana reaksiyasından narahatlığını ifadə edib. İspaniyanın daxili işlər naziri Fernando Qrande-Marlaska bəzi Avropa tərəfdaşlarını böhran fonunda eqoizmdə ittiham edib. Xarici işlər naziri Xose Manuel Albares isə Aİ ölkələrindən real həmrəylik tələb edib.
Böhran İspaniyanın daxili siyasi gündəminə də təsir göstərib. Müxalif Xalq Partiyasının lideri Alberto Nunyes Feyxoo hökumətin Avropada və beynəlxalq arenada təcrid olunmaq riski ilə üzləşdiyini bildirib. Sağçı “Vox” partiyası isə Seuta sərhədinin hərbiləşdirilməsinə çağırıb.
Seutədə miqrant böhranı ilk dəfə baş vermir. 2021-ci ilin mayında Mərakeşdən təxminən 10 min qanunsuz miqrant bir neçə gün ərzində şəhərə daxil olmuşdu. Həmin vaxt hadisə Madridlə Rabat arasında diplomatik gərginlik fonunda baş vermişdi.
Hazırkı böhranla bağlı İspaniya hökuməti Mərakeşi birbaşa ittiham etməkdən çəkinir və Rabatdan hadisənin araşdırılmasını istəyib. Mərakeş hakimiyyəti isə ölkəsinin qanunsuz miqrasiya ilə mübarizədə məsuliyyətli tərəfdaş olduğunu və üzərinə götürdüyü öhdəlikləri yerinə yetirdiyini bildirir.
“El Pais” qəzetinin yazdığına görə, İspaniya kəşfiyyatı miqrant axınının Mərakeş tərəfindən əvvəlcədən planlaşdırıldığını düşünmür. Bununla belə, Rabatın baş verənlərə səssiz razılıq verdiyi ehtimal edilir. İspaniyalı analitiklər hesab edirlər ki, Mərakeş yaranmış vəziyyətdən Seuta və Melilya ilə bağlı ərazi iddialarını yenidən beynəlxalq gündəmə gətirmək üçün istifadə edə bilər.
21:24 04.08.2026
Oxunuş sayı: 55
