KİV: Ukrayna ordusu Xarkov istiqamətində əks-hücuma keçib
Ukrayna Silahlı Qüvvələri Xarkov vilayətinin Kupyansk istiqamətində Rusiya ordusunun hücumlarını dəf edərək uğurlu əks-hücum əməliyyatları həyata keçirir.
Crossmedia.az xəbər verir ki, “RBC-Ukrayna” bu barədə ABŞ-nin Müharibənin Öyrənilməsi İnstitutunun (ISW) hesabatına istinadən məlumat yayıb.
Hesabata görə, Rusiya ordusu avqustun 2-3-də Kupyansk istiqamətində hücumlarını davam etdirsə də, Ukrayna qüvvələri bu ərazidə əks-hücuma keçib və paralel olaraq öz hücum əməliyyatını həyata keçirir.
Rusiya hərbi bloqerləri ordularının Kupyansk şəhərində irəlilədiyini iddia edərək, şəhərin mərkəzi hissəsində, Radkivkanın cənubunda, Kupyansk-Vuzlovoyenin şimalında və həmin yaşayış məntəqəsinin qərbində mövqe tutduqlarını bildiriblər. Onların sözlərinə görə, Ukrayna qüvvələri şəhərin kənarlarından əks-hücum edir və Kupyansk-Vuzlovoyedə Oskol çayı üzərindəki körpü uğrunda döyüşlər davam edir.
Lakin ISW analitikləri qeyd ediblər ki, hazırda bu istiqamətdə Rusiya ordusunun irəliləməsini təsdiqləyən etibarlı sübut yoxdur.
Bununla yanaşı, avqustun 3-də ukraynalı hərbi ekspert Yuri Butusov Kupyansk istiqamətində Rusiyaya məxsus 2S44 "Giatsint-K" təkərli özüyeriyən artilleriya qurğusunun məhv edildiyini bildirib. Onun sözlərinə görə, bu, Rusiyanın Ukraynaya qarşı genişmiqyaslı işğalı başlayandan bəri həmin sistemin məhv edilməsinin ikinci təsdiqlənmiş halıdır.
15:16 04.08.2026
Oxunuş sayı: 53
