Böyük Britaniyada istilər davam edir, bəzi bölgələrdə yağış gözlənilir
Böyük Britaniyada rekord istilər davam etsə də, ölkənin bəzi bölgələrində yağış və qeyri-sabit hava şəraiti proqnozlaşdırılır. Meteoroloqlar həftənin ikinci yarısından etibarən temperaturun tədricən enəcəyini bildirirlər.
Crossmedia.az xəbər verir ki, “Sky News” bu barədə məlumat yayıb.
Böyük Britaniya Səhiyyə Təhlükəsizliyi Agentliyi (UKHSA) Şərqi Midlends, Şərqi İngiltərə, Cənub-Şərq və London üçün çərşənbə səhərinədək narıncı səviyyəli istilik xəbərdarlığı qüvvədə saxlayıb. Şimal-Qərb, Cənub-Qərb, Qərbi Midlends, Yorkşir və Hambersayd bölgələrində isə sarı xəbərdarlıq elan olunub.
İyulun rekord dərəcədə quraq keçməsindən sonra avqustun 4-də Şimali İrlandiya, Şotlandiya, İngiltərənin qərbi və Uelsdə yağış gözlənilir. Buna baxmayaraq, Midlends, ölkənin şərq hissəsi və Cənub-Şərqdə hava əsasən quru, günəşli və rütubətli olacaq.
Bazar ertəsi Surrey qraflığının Uisli bölgəsində temperatur 33,5 dərəcəyə çatıb. Bununla da 2026-cı ildə Böyük Britaniyada temperaturun 32 dərəcə və ya daha yüksək olduğu günlərin sayı 20-yə yüksəlib. Bu göstərici 1995-ci ildə qeydə alınmış 19 günlük əvvəlki rekordu geridə qoyub.
UKHSA xəbərdarlıq edir ki, davam edən istilər Milli Səhiyyə Xidmətinin (NHS) iş yükünü artıra bilər.
Meteorologiya Xidməti bildirir ki, İngiltərənin cənub-şərqində yağıntının həcmi hələ də quraqlığın aradan qalxması üçün kifayət etməyəcək.
Proqnozlara əsasən, həftənin ikinci yarısında temperatur enəcək, bəzi bölgələrdə isə, xüsusilə Şimali İrlandiyada, göy gurultulu leysanlarla bağlı sarı xəbərdarlıq qüvvəyə minəcək.
Meteorologiya Xidmətinin ilkin məlumatına görə, bu ilin iyul ayı İngiltərə və Uelsdə müşahidələrin aparıldığı dövr ərzində ən quraq iyul ayı olub. Cənubi İngiltərədə isə bu, 1836-cı ildən bəri qeydə alınan ən quraq iyul kimi tarixə düşüb.
14:59 04.08.2026
Oxunuş sayı: 46
