Yaponiya hərbi güclənməni iqtisadi rifahın açarı kimi təqdim edir
Yaponiya hökuməti hərbi potensialın artırılmasını təkcə ölkənin təhlükəsizliyinin təminatı deyil, həm də iqtisadi inkişafın mühüm aləti kimi qiymətləndirir. Bu yanaşma ölkənin yeni müdafiə üzrə “Ağ kitab”ında əks olunub.
Crossmedia.az xəbər verir ki, “Reuters” bu barədə məlumat yayıb.
Sənəddə Çin, Rusiya və Şimali Koreyadan qaynaqlanan təhlükələr fonunda Yaponiyanın texnologiya potensialından daha geniş istifadə etməsi, müdafiə sənayesinə sərmayə yatırması, startapları dəstəkləməsi və silah istehsalında kommersiya komponentlərindən daha çox faydalanması tövsiyə olunur.
Müdafiə Nazirliyinin təqdimat materialında qeyd edilir ki, müdafiəyə yatırılan investisiyalar yalnız təhlükəsizliyi gücləndirmir, həm də iqtisadiyyata və vətəndaşların rifahına müsbət təsir göstərir. Bu yanaşma Baş nazir Sanae Takaçinin dövlət investisiyalarını iqtisadi artımın stimullaşdırılması üçün istifadə etmək siyasəti ilə uzlaşır.
Bu il “Ağ kitab”ın üz qabığı da əvvəlki illərdən fərqlənir. Hərbçilər və silahların əvəzinə yüksək texnologiyalı şəhərdə yaşayan xoşbəxt ailənin anime üslubunda təsviri seçilib. Nazirlik bunu “gələcəyin simvolu” kimi izah edib.
Sənəd yeni milli təhlükəsizlik strategiyasının hazırlanması ərəfəsində dərc olunub. Ekspertlər hesab edirlər ki, strategiyada əsas diqqət Çinin Tayvana qarşı mümkün hərbi əməliyyatlarının qarşısının alınmasına yönələcək və müdafiə xərclərinin daha da artırılması təklif ediləcək.
“Ağ kitab”da vurğulanır ki, Çinin hərbi fəaliyyəti və digər addımları Yaponiya və beynəlxalq ictimaiyyət üçün ciddi narahatlıq doğurur və Tokio üçün ən böyük strateji çağırış hesab olunur.
Xatırladılır ki, Baş nazir Sanae Takaçi ötən ilin noyabrında Çin Tayvana hücum edərsə və bu, Yaponiyanın təhlükəsizliyini təhdid edərsə, Özünümüdafiə Qüvvələrinin istifadə oluna biləcəyini bildirmişdi. Pekin həmin bəyanatı sərt tənqid edərək onun geri götürülməsini tələb etmişdi.
Yaponiya İkinci Dünya müharibəsindən sonra ən böyük hərbi modernizasiya proqramını həyata keçirir. Müdafiə xərcləri artıq ÜDM-in 2 faizinə çatdırılıb. Bunun maliyyələşdirilməsi üçün vergi artımları, büdcə islahatları və birdəfəlik gəlir mənbələrindən istifadə olunur.
2026–2027-ci maliyyə ili üçün rekord həcmdə – 122,3 trilyon yen büdcə qəbul edilib. Bundan əlavə, enerji qiymətlərinin artımının əhali və biznesə təsirini azaltmaq məqsədilə 3,1 trilyon yen həcmində əlavə dəstək paketi ayrılıb.
İndiyədək yeni müdafiə vəsaitlərinin böyük hissəsi 1000 kilometrdən artıq məsafədəki hədəfləri vura bilən raketlərin alınmasına yönəldilib. Gələcəkdə isə xərclərin əhəmiyyətli hissəsinin Ukrayna müharibəsində geniş istifadə olunan pilotsuz uçuş aparatları və digər pilotsuz döyüş sistemlərinə sərf ediləcəyi gözlənilir.
14:41 04.08.2026
Oxunuş sayı: 58
