Banqladeş Hindistandan Şeyx Həsinanın çıxışı ilə bağlı mövqeyini açıqlamağı tələb edib
Banqladeş hökuməti Hindistandan ölkənin sabiq baş naziri Şeyx Həsinanın Yeni Dehlidən planlaşdırılan videomüraciəti ilə bağlı rəsmi mövqeyini açıqlamağı istəyib. Dəkkə hesab edir ki, axtarışda olan şəxsin siyasi fəaliyyətinə şərait yaradılması iki ölkə arasında münasibətlərə mənfi təsir göstərə bilər.
Crossmedia.az xəbər verir ki, “Reuters” bu barədə məlumat yayıb.
Bu, Banqladeş hakimiyyətinin avqustun 5-də Yeni Dehlidə keçiriləcək və tələbə hərəkatının Həsinə hökumətini devirməsinin ikinci ildönümünə həsr olunmuş tədbirdə onun videobağlantı vasitəsilə çıxış etməsi planına ilk rəsmi reaksiyasıdır.
Tədbirin Cənubi Asiya Xarici Müxbirlər Klubunun (“Foreign Correspondents' Club of South Asia”) təşkilatçılığı ilə keçiriləcəyi, Şeyx Həsinanın oğlu Sacib Vazed Coyun da çıxış edəcəyi bildirilib.
Banqladeşin xarici işlər üzrə dövlət naziri Şama Obayed İslam deyib ki, ölkəsi Hindistanla münasibətləri gələcəyə hesablanmış yanaşma əsasında inkişaf etdirmək istəyir.
“Biz Hindistanla münasibətləri irəliyə baxan yanaşma əsasında inkişaf etdiririk. Bu irəliləyişin zərər görməsini istəmirik. Hindistan bu məsələdə öz mövqeyini aydın şəkildə ortaya qoymalıdır”, – deyə nazir bildirib.
Şeyx Həsinə 2024-cü ilin avqustunda ölkədən qaçaraq Hindistana sığınıb. Banqladeş hakimiyyəti ona qarşı açılmış çoxsaylı cinayət işləri fonunda onun ekstradisiyasını tələb edir.
2025-ci ildə məhkəmə Həsinəni 2024-cü ildə etiraz aksiyalarının yatırılması zamanı baş verən hadisələrə görə ölüm cəzasına məhkum edib. Buna baxmayaraq, sabiq baş nazir “Reuters” agentliyinə müsahibəsində dekabr ayında Banqladeşə qayıtmağı planlaşdırdığını bildirib.
14:34 04.08.2026
Oxunuş sayı: 58
