Cənubi Koreyada rekord istilər: Prezident fövqəladə vəziyyət elan etməyə çağırdı
Cənubi Koreyada rekord istilər nəticəsində ölənlərin sayı 19 nəfərə çatıb. Prezident Li Ce Myun baş verənləri milli fəlakət adlandıraraq hakimiyyət orqanlarına fövqəladə tədbirlərin görülməsi barədə göstəriş verib.
Crossmedia.az xəbər verir ki, “Reuters” bu barədə məlumat yayıb.
Prezident Nazirlər Kabinetinin iclasında çıxışı zamanı aidiyyəti qurumlara əhaliyə dəstəyi artırmağı, elektrik şəbəkələrinin vəziyyətini yoxlamağı və uzunmüddətli isti hava şəraitinə uyğun yeni fövqəladə hallar sisteminin hazırlanmasını tapşırıb.
“Daha böyük narahatlıq doğuran məsələ odur ki, anomal hava şəraiti uzun müddət davam edə bilər. Buna görə də fəlakətlərə reaksiya sisteminin əsaslı şəkildə yenidən qurulması vacibdir”, – deyə Li bildirib.
Ölkənin Meteorologiya Administrasiyasının məlumatına görə, ölkənin cənub-şərqində yerləşən Yansan şəhərində bazar günü havanın temperaturu 42,5 dərəcə selsiyə yüksəlib. Bu, son 122 ildə qeydə alınan ən yüksək göstəricidir.
Meteoroloqlar ilk dəfə olaraq Seulun bəzi rayonları üçün, daha sonra isə bütün paytaxt üzrə ən yüksək səviyyəli isti hava xəbərdarlığı elan ediblər.
Xəbərdarlıq çərçivəsində kənd təsərrüfatı işləri, tikinti meydançalarında fəaliyyət və açıq havada idman tədbirlərinin dayandırılması tövsiyə olunur.
Seulun Yonqdınqpo rayonunda yaşayan sakinlər bu cür istilərlə ilk dəfə üzləşdiklərini bildiriblər. Hakimiyyət orqanları həssas əhali qruplarını kondisionerlə təmin olunan müvəqqəti sığınacaqlara köçürür.
Yanğınsöndürmə və digər xidmətlər küçələrə su səpir, istilikdən zərər çəkə biləcək sakinləri nəzarətdə saxlayır.
Koreya Xəstəliklərə Nəzarət və Profilaktika Agentliyinin məlumatına əsasən, isti hava nəticəsində ölən 19 nəfərdən 13-ü 80 yaşdan yuxarı olub.
Mayın 15-dən indiyədək ölkə üzrə 2025 nəfərdə istiliklə əlaqəli sağlamlıq problemləri qeydə alınıb.
Həddindən artıq isti hava səbəbindən Seul və Qvanqju şəhərlərində keçirilməsi planlaşdırılan iki beysbol oyunu da ləğv edilib.
14:28 04.08.2026
Oxunuş sayı: 55
