Mütəxəssislərdən xəbərdarlıq: Gündə 1 saat idman etmək kifayət etmir
Günün böyük hissəsini oturaraq keçirmək müntəzəm idmanla məşğul olan insanlar üçün də ciddi sağlamlıq riskləri yarada bilər.
Crossmedia.az xəbər verir ki, CNN TÜRK-ün məlumatına görə, mütəxəssislər gündə bir saat idman etməyin sağlam həyat üçün vacib olduğunu bildirsələr də, günün qalan hissəsini hərəkətsiz keçirməyin ürək-damar xəstəlikləri, insulin müqaviməti və yüksək qan təzyiqi riskini artırdığını vurğulayırlar.
Məlumata görə, son elmi araşdırmalar uzun müddət fasiləsiz oturmağın fəsadlarının təkcə idmanla tam aradan qaldırıla bilmədiyini göstərib. Xüsusilə uzun saatlar masa arxasında, avtomobildə və ya ekran qarşısında oturmaq qan dövranını zəiflədir, əzələlərin fəaliyyətini azaldır və maddələr mübadiləsinə mənfi təsir göstərir.
Araşdırmada qeyd olunub ki, gün ərzində atılan addımların sayını artırmaq və qısa hərəkət fasilələri vermək bu riskləri azaltmağa kömək edə bilər. Xüsusilə hər yarım saatdan bir təxminən 5 dəqiqə yüngül tempdə yerimək qan şəkərinin yüksəlməsini əhəmiyyətli dərəcədə azaldır və qan təzyiqinin aşağı düşməsinə müsbət təsir göstərir.
Mütəxəssislərin sözlərinə görə, hər saat cəmi bir dəqiqə gəzmək belə qan dövranını yaxşılaşdırır, yorğunluğu azaldır və əhval-ruhiyyəni yüksəldir. Buna görə də planlı idmanla yanaşı, gün ərzində mütəmadi hərəkət etmək sağlam həyat tərzinin vacib hissəsi hesab olunur.
08:30 04.08.2026
Oxunuş sayı: 55
