Ford rəhbəri: Çin avtomobil istehsalçıları 5-10 il ərzində ABŞ bazarına daxil ola bilər
Crossmedia.az "Jalopnik"ə istinadən xəbər verir ki, Ford Motor Company-nin baş icraçı direktoru Cim Farli Çin avtomobil istehsalçılarının növbəti 5-10 il ərzində ABŞ bazarına daxil olacağını istisna etməyib.
Mənbələrin bildirdiyinə görə, Farli şirkət əməkdaşları ilə görüşdə Çin brendlərinin ABŞ bazarında fəaliyyətə başlamasını demək olar ki, qaçılmaz hesab etdiyini bildirib. Onun fikrincə, bunun ən real vaxtı qarşıdakı 5-10 ilin sonlarına təsadüf edə bilər.
Hazırda Çin elektromobil istehsalçıları Meksika kimi ABŞ-a yaxın bazarlarda mövqelərini gücləndirirlər. Ekspertlər Kanadanın da ABŞ bazarına çıxışdan əvvəl sınaq bazarı rolunu oynaya biləcəyini qeyd edirlər.
Bununla belə, hazırda ABŞ-da Çin istehsalı olan elektromobillərin satışı ciddi məhdudiyyətlərlə üzləşir. Belə ki, onlara əlavə 100 faiz gömrük rüsumu tətbiq olunur, həmçinin avtomobillərdə Çin istehsalı proqram təminatı və avadanlıqlarının istifadəsinə məhdudiyyətlər qoyulub.
Artan rəqabət fonunda Ford qiymət və səmərəlilik baxımından Çin modelləri ilə rəqabət aparacaq daha əlçatan elektromobil seriyasını hazırlayır.
01:30 04.08.2026
Oxunuş sayı: 66
