Trampın heykəllərə milyonlarla dollar xərcləməsi mübahisə yaradıb
ABŞ-nin paytaxtı Vaşinqtonda Müharibə sənəti və Sülh sənəti monumentlərinin yenilənmiş bürünc heykəlləri rəsmi olaraq təqdim edilib.
Crossmedia.az bu barədə xarici mediaya istinadən xəbər verir.
ABŞ Milli Park Xidmətinin bərpa etdiyi heykəllərin yenilənməsi Prezident Donald Trampın şəxsi nəzarəti altında həyata keçirilib və layihəyə dövlət büdcəsindən təxminən 5 milyon dollar xərclənib.
Linkoln memorialının yaxınlığında yerləşən dörd monumental atlı heykəlin üzəri 23,75 karatlıq qızıl yarpaq təbəqəsi ilə örtülüb. Tramp özü də iskelelərin sökülməsini “Truth Social” sosial şəbəkəsində elan edərək yenilənmiş abidələrin ilk fotolarını paylaşıb.
Heykəllərin yeni görünüşü Vaşinqton sakinləri və turistlər arasında fikir ayrılığına səbəb olub. Bəzi insanlar onları zövqsüz və vulqar hesab edərək bərpa üçün xərclənən vəsaitin daha faydalı məqsədlərə yönəldilə biləcəyini bildiriblər.
Digər tərəfdən, bəzi turistlər heykəllərin yeni görünüşünü bəyəniblər. Onlar abidələrin qızılı rəngdə daha diqqətçəkən və parlaq göründüyünü deyiblər.
Məlumata görə, heykəllərin qızılla örtülməsi ilə bağlı müqavilə aprelin ortalarında Merilend ştatında yerləşən bərpa studiyalarından birinə açıq tender keçirilmədən verilib. İşlərin ABŞ-nin Müstəqillik Günü olan 4 iyula qədər başa çatdırılması planlaşdırılıb. Lakin bərpa işləri nəzərdə tutulandan bir neçə həftə daha uzun çəkib.
Heykəllərin bərpası Trampın ikinci prezidentlik dövründə Vaşinqtonun memarlıq simasının yenilənməsi üzrə daha geniş planının yalnız bir hissəsidir.
“Washington Post” və Ipsos-un son sorğusuna əsasən, amerikalıların təxminən 65 faizi prezidentin şəhərsalma təşəbbüslərinə mənfi yanaşır. Bu layihələrə Ağ Evdə yeni bal zalının tikintisi, Linkoln memorialı ilə Arlinqton Milli Qəbiristanlığı arasında zəfər tağının inşası və Güzgü hovuzunun yenidən qurulması daxildir.
“Financial Times”ın araşdırmasına görə, Trampın Vaşinqtonun yenilənməsi ilə bağlı planlaşdırdığı bütün layihələrin ümumi dəyəri, həm özəl ianələr, həm də büdcə vəsaiti nəzərə alınmaqla, 1 milyard dolları ötə bilər. Təkcə Ağ Evdə bal zalının və onun təhlükəsizlik sistemlərinin tikintisinin dəyərinin 800 milyon dollardan çox olacağı qiymətləndirilir.
08:30 02.08.2026
Oxunuş sayı: 82
