Ukrayna ilk dəfə Aİ-nin Mülki Müdafiə Mexanizmi çərçivəsində yardım göndərib
Ukrayna ilk dəfə Avropa İttifaqının Mülki Müdafiə Mexanizmi çərçivəsində digər ölkələrə yardım göstərən dövlət kimi fəaliyyətə başlayıb.
Crossmedia.az xəbər verir ki, Avropa Komissiyasının sədri Ursula fon der Lyayen bu barədə "X" sosial şəbəkəsində paylaşım edib.
Onun sözlərinə görə, Ukraynadan 70 nəfərlik yanğınsöndürən qrup Fransaya yola düşüb. Onlar ölkədə davam edən genişmiqyaslı meşə yanğınlarının söndürülməsinə cəlb olunacaqlar.
Ursula fon der Lyayen qeyd edib ki, Ukrayna Rusiya ilə müharibə şəraitində olmasına baxmayaraq, Avropa ölkələrinə dəstəyini davam etdirir.
“Bu, əsl Avropa həmrəyliyidir. Ukrayna hər gün sübut edir ki, onun bizim İttifaqda yeri var”, – deyə Avropa Komissiyasının sədri bildirib.
16:27 01.08.2026
Oxunuş sayı: 52
