Rusiya: Silah tədarükü beş, döyüş sursatı isə 12 dəfə artırılıb
Rusiya Müdafiə Nazirliyi xüsusi hərbi əməliyyat başlayandan bəri silah, hərbi və xüsusi texnika tədarükünün beş, silah və döyüş sursatı təminatının isə 12 dəfə artırıldığını açıqlayıb.
Crossmedia.az xəbər verir ki, Rusiyanın "TASS" agentliyi bu barədə məlumat yayıb.
Məlumata görə, Rusiya Silahlı Qüvvələrinin Logistika Qərargahında Logistika Xidmətinin yaradılmasının 326-cı ildönümünə həsr olunmuş iclas keçirilib.
Müdafiə nazirinin müavini, general-polkovnik Aleksandr Sançik bildirib ki, Qərbin sərt sanksiyalarına baxmayaraq, ölkənin sənaye kompleksi ordunun ehtiyaclarını tam şəkildə təmin etməyə davam edir.
Onun sözlərinə görə, sənaye müəssisələri ilə sıx əməkdaşlıq nəticəsində logistika təyinatlı silah və hərbi texnika ilə təminat səviyyəsi 97 faizə çatdırılıb.
General-polkovnik əlavə edib ki, istehsal və təmir imkanlarını genişləndirmək məqsədilə Müdafiə Nazirliyi üç təmir zavodunu öz balansına götürüb. Bu addım hərbi texnikanın bərpa müddətini 15 faizə qədər azaltmağa və əsaslı təmir xərclərini aşağı salmağa imkan verib.
Tədbirin sonunda Aleksandr Sançik hərbçiləri və veteranları peşə bayramı münasibətilə təbrik edib, onların xidmətinə, döyüş şəraitində göstərdikləri fədakarlığa və peşəkarlıqlarına görə təşəkkürünü bildirib.
14:37 01.08.2026
Oxunuş sayı: 61
