Xarici xəbərlər

İspaniya miqrasiya böhranına görə Aİ-dən təcili görüş istəyib

İspaniyanın Baş naziri Pedro Sançes Seutadakı miqrasiya böhranına bəzi Avropa hökumətlərinin reaksiyasından narahatlığını bildirib və Avropa İttifaqından ortaq tədbirlər görməyi tələb edib.

Crossmedia.az xəbər verir ki, "Cadena SER" radiostansiyası bu barədə məlumat yayıb.

Məlumata görə, Sançes Avropa Komissiyasının rəhbəri Ursula fon der Lyayenə və Avropa Şurasının Prezidenti Antonio Koştaya məktub göndərərək bəzi Avropa ölkələrinin mövqeyindən "ciddi narahatlıq" ifadə edib.

İspaniya hökumət başçısı bildirib ki, bəzi ölkələr məsələyə "qərəzlər, yanlış məlumatlar, yanlış təsəvvürlər və ya siyasi maraqlar" əsasında yanaşıb. Lakin o, konkret hansı dövlətləri nəzərdə tutduğunu açıqlamayıb.

Sançes Avropa Şurasından Aİ ölkələrinin daxili işlər nazirlərinin videokonfrans formatında fövqəladə görüşünün təcili keçirilməsini də istəyib.

Baş nazir məktubunda qeyd edib ki, belə görüş Aİ-nin xarici sərhədlərində yaranan vəziyyətlərə vahid cavab mexanizminin hazırlanmasına və sərhəd təhlükəsizliyinin yalnız ön cəbhədə olan ölkələrin deyil, bütün üzv dövlətlərin ortaq məsuliyyəti olduğunu təsdiqləməyə imkan verməlidir.

🖨 Çap et

14:08 01.08.2026

Oxunuş sayı: 63