Ermənistan-Gürcüstan sərhədində yenidən uzun növbələr yaranıb
Ermənistan-Gürcüstan sərhədində yerləşən "Baqratashen" və "Sadaxlo" buraxılış məntəqələrində yüzlərlə avtomobil və sərnişinin iştirakı ilə uzun növbələr yaranıb.
Crossmedia.az xəbər verir ki, Ermənistan KİV-i bu barədə məlumat yayıb.
Məlumata görə, sərhəddə yaranmış sıxlığın əsas səbəbləri turizm mövsümünün qızğın dövrü, nəqliyyat axınının artması və buraxılış məntəqələrinin məhdud ötürücülük qabiliyyəti göstərilir. Bildirilir ki, əsas problemlərdən biri də iki ölkənin sərhəd qurumları arasında koordinasiyanın kifayət qədər effektiv olmamasıdır.
Məsələnin həlli məqsədilə iyulun 31-də Ermənistan Milli Təhlükəsizlik Xidmətinin Sərhəd Qoşunlarının komandanı ilə Gürcüstan Daxili İşlər Nazirliyinin Patrul Polisi rəhbəri arasında görüş keçirilib.
Tərəflər sərhəddən keçid prosedurlarının sadələşdirilməsi və qarşılıqlı əməkdaşlığın gücləndirilməsi barədə razılığa gəlsələr də, buraxılış məntəqələrinin hələ də maksimal yüklənmə ilə işlədiyi bildirilir.
10:33 01.08.2026
Oxunuş sayı: 54
