Alim: "Qunduzlar təbiətin mühəndisləridir və ekosistem üçün əvəzolunmaz rol oynayır"
Qunduzlar çaylara və təbiətə zərər verən heyvanlar deyil, əksinə, su və sahilyanı ekosistemlərin qorunmasında mühüm rol oynayırlar.
Crossmedia.az xəbər verir ki, bunu Rusiya Elmlər Akademiyasının əməkdaşı, akademik V.E. Sokolov adına Terioloji Cəmiyyətin qunduzlar üzrə işçi qrupunun rəhbəri İvan Başinski bildirib. Onun sözlərinə görə, qunduzlar bəndlər tikərək su ehtiyatlarını artırır, torpağın rütubətini qoruyur, yeraltı suların səviyyəsini yüksəldir, quraqlıq və meşə yanğınlarının təsirlərini azaltmağa kömək edir. Həmçinin onların yaratdığı gölməçələr təbii filtr rolunu oynayır və bir çox canlı növü üçün yaşayış mühiti yaradır.
Mütəxəssis qeyd edib ki, qunduzların insanlarla qonşuluğu bəzən ağacların zədələnməsi və ya ərazilərin su altında qalması kimi problemlər yaratsa da, bunların həlli mümkündür. O bildirib ki, ağacların metal torlarla qorunması, qunduz gölməçələrində artıq suyun xüsusi borular vasitəsilə yönləndirilməsi və sahillərin möhkəmləndirilməsi bu problemlərin qarşısını almağa kömək edir.
Başinskinin sözlərinə görə, dünyanın bir çox ölkəsində tətbiq olunan "qunduz menecmenti" yanaşması insanların və qunduzların birgə təhlükəsiz yaşayışını təmin etməyə xidmət edir. O əlavə edib ki, Moskva ətrafında hazırda yüzlərlə qunduz yaşayır və onların qorunması üçün xüsusi tədbirlər həyata keçirilir.
02:30 01.08.2026
Oxunuş sayı: 57
