KİV: Ukrayna Rusiya enerji infrastrukturuna zərbələrin taktikasını dəyişib
Ukrayna Rusiya enerji infrastrukturuna qarşı pilotsuz uçuş aparatları ilə həyata keçirdiyi hücumlarda yeni taktika tətbiq edir. Artıq əsas məqsəd iri yanğınlar yaratmaq deyil, müəssisələrin fəaliyyətini uzun müddət iflic edəcək kritik avadanlıqları sıradan çıxarmaqdır.
Crossmedia.az xəbər verir ki, "Financial Times" (FT) bu barədə məlumat yayıb.
Nəşrin yazdığına görə, hücumlar planlaşdırılarkən enerji mütəxəssisləri operatorlara müəssisələrin ən həssas və əvəzlənməsi ən çətin olan avadanlıqları barədə məlumat verir. Məqsəd təmir prosesini mümkün qədər bahalı və uzunmüddətli etməkdir.
FT bildirir ki, bəzi hallarda eyni obyektlər təmir işləri başa çatmadan yenidən hədəfə alınır. Əsas hədəfə çatmaq mümkün olmadıqda isə pilotsuz aparatların əvvəlcədən müəyyən edilmiş ehtiyat obyektlərə yönəldildiyi qeyd olunur.
Nəşrin məlumatına görə, ABŞ və Fransanın kəşfiyyat məlumatları Rusiyanın hava hücumundan müdafiə sistemlərinin yerləşdiyi ərazilərin müəyyənləşdirilməsinə və onlardan yayınma marşrutlarının hazırlanmasına da kömək edib.
16:26 29.07.2026
Oxunuş sayı: 39
