Cinayət və cəzasızlığın Hindistan nümunəsi - Mütəxəssis danışdı
1984-cü ilin payızında Hindistanda Zikh icmasına qarşı törədilmiş kütləvi zorakılıq hadisələri müasir tarixdə dövlət səviyyəsində təşkil olunmuş ən ağır insan hüquqları pozuntularından biri kimi dəyərləndirilir. Paytaxt Dehli və ətraf əraziləri əhatə edən bu qanlı hadisələr təkcə minlərlə insanın həyatına son qoymaqla kifayətlənməyib, eyni zamanda on minlərlə ailənin sosial və psixoloji həyatında dərin izlər buraxıb.
Aradan onilliklər keçməsinə baxmayaraq, baş verən cinayətlərin təşkilində və icrasında adı hallanan yüksək ranqlı məmurların və siyasi fiqurların hələ də məsuliyyətə cəlb olunmaması beynəlxalq insan haqları gündəmində ciddi narahatlıq doğurur. Hadisələrin sistemli xarakter daşıması və dövlət strukturlarının rolu ilə bağlı sənədləşdirilmiş faktlar isə ədalətin bərpası ilə bağlı çağırışların aktuallığını daha da gücləndirir.
Mövzu barədə beynəlxalq münasibətlər üzrə mütəxəssis Əziz Əlibəyli Crossmedia.az-la öz fikirlərini bölüşüb: "Bu, son dərəcə ciddi bir problemdir. Qlobal siyasi, etik və hüquqi müstəvidə qiymətləndirildikdə, Hindistanda Zikh icmasına qarşı törədilmiş qanlı hadisələr və həmin cinayətlərin arxasında dayanan yüksək vəzifəli şəxslər və dövlət məmurları faktiki olaraq cəzasız qalmışdır. Bu vəziyyət hüququn aliliyi və beynəlxalq insan hüquqları prinsipləri baxımından dərin narahatlıq doğurur. 1980-ci illərdən etibarən baş verən bu zorakılıq halları təkcə ayrı-ayrı cinayətlər deyil, həm də dövlət strukturlarının passivliyi və ya susqunluğu fonunda sistemli xarakter almışdır. Cəzasızlıq mühiti isə gələcəkdə yeni cinayətlərin törədilməsi üçün təhlükəli presedent yaratmışdır. Bu baxımdan Hindistan dövləti beynəlxalq etik normaların, azlıqların müdafiəsi öhdəliklərinin və dövlət məsuliyyəti prinsiplərinin pozulmasına görə ciddi cavabdehlik daşıyır".
Elmir Heydərli
11:46 04.02.2026
Oxunuş sayı: 526
