“Anthropic” məlumat mərkəzləri üçün 3,4 milyard dollarlıq enerji sazişi bağlayıb
Süni intellekt şirkəti “Anthropic” məlumat mərkəzlərini elektrik enerjisi ilə təmin etmək üçün təbii qazla işləyən generatorların alınmasına təxminən 3,4 milyard dollar ayırıb.
Crossmedia.az xəbər verir ki, bu barədə “Financial Times” nəşri məlumat yayıb.
Məlumata görə, “Anthropic” sentyabrın sonunda ABŞ-nin Texas ştatının San-Antonio şəhərində yerləşən “OnePWR Solutions” şirkətindən ümumilikdə 1,7 giqavat gücündə ağır sənaye generatorlarının tədarükü ilə bağlı öhdəliklər əldə edib.
Razılaşmaya generatorların quraşdırılması üçün zəruri mühəndislik və tikinti imkanları da daxildir. Bununla belə, “Anthropic” “OnePWR Solutions” şirkətini satın almayıb və təchizatçının əməkdaşları süni intellekt şirkətinə keçməyib.
“Reuters” agentliyi məlumatı müstəqil şəkildə təsdiqləyə bilmədiyini bildirib. Həm “Anthropic”, həm də “OnePWR Solutions” məsələ ilə bağlı şərh sorğusuna cavab verməyib.
Qeyd edək ki, “Claude” süni intellekt modellərinə artan tələbat “Anthropic”i hesablama və enerji gücünü genişləndirməyə sövq edir. Şirkətin növbəti 10 il ərzində süni intellekt infrastrukturu qurmaq üçün 500 milyard dollardan çox vəsait xərcləməyi planlaşdırdığı bildirilir.
23:00 08.11.2026
Oxunuş sayı: 95
