Türkiyədə dronlar üçün xüsusi hava yolları yaradılacaq
Türkiyədə pilotsuz uçuş aparatları (PUA) üçün xüsusi rəqəmsal hava dəhlizləri yaradılacaq. Yeni sistem vasitəsilə dronlar müəyyən edilmiş marşrutlar üzrə təhlükəsiz və nəzarətli şəkildə uça biləcək.
Crossmedia.az xəbər verir ki, bu barədə Türkiyənin nəqliyyat və infrastruktur naziri Abdulkadir Uraloğlu “Anadolu” agentliyinə müsahibəsində məlumat verib.
Nazir bildirib ki, dronlar üçün “hava magistralları” adlandırılan xüsusi dəhlizlərin yaradılması istiqamətində hüquqi baza hazırlanıb.
Onun sözlərinə görə, yeni qaydalar PUA-ların uzun məsafəli, operatorun birbaşa görmə məsafəsindən kənar və avtonom uçuşlarını müəyyən edilmiş hava dəhlizlərində həyata keçirməsinə imkan verəcək.
Uraloğlu qeyd edib ki, dəhlizlərin sərhədləri, giriş-çıxış nöqtələri, uçuş istiqamətləri, tutumu və hava vasitələri arasında minimum məsafə rəqəmsal şəkildə müəyyənləşdiriləcək.
Bu məlumatlar Türkiyə Mülki Aviasiya Baş İdarəsinin (SHGM) mərkəzi rəqəmsal platforması olan PUA İzləmə və Hava Hərəkətinin İdarə Edilməsi Sistemi (İHATTYS) vasitəsilə yayımlanacaq.
Nazir bildirib ki, dronların proqram təminatı həmin məlumatları birbaşa oxuya biləcək və uçuşlar müəyyən edilmiş qaydalar əsasında həyata keçiriləcək. Hava dəhlizləri qadağan olunmuş, məhdudlaşdırılmış və təhlükəli zonalardan, eləcə də NOTAM bildirişi yayımlanan ərazilərdən kənarda planlaşdırılacaq.
Sistem logistika və tibbi daşımada istifadə olunacaq
Uraloğlunun sözlərinə görə, PUA dəhlizlərində uzun məsafəli və avtonom uçuş marşrutları süni intellektin köməyi ilə müəyyənləşdiriləcək.
Uçuşların idarə edilməsi İHATTYS vasitəsilə həyata keçiriləcək. Zərurət yarandıqda uçuş sərhədləri daraldıla, marşrut dəyişdirilə, PUA-ların enişi təmin edilə və ya uçuş dayandırıla biləcək.
Əlaqə kəsildiyi halda isə dronlar yaşayış məntəqələrinin üzərindən keçmədən əvvəlcədən müəyyən edilmiş təhlükəsiz ərazilərə yönləndiriləcək.
Nazir yeni sistemin xüsusilə logistika və səhiyyə sahəsində əhəmiyyətli imkanlar yaradacağını vurğulayıb.
Belə ki, dronlardan şəhərlərarası yük daşımalarında, logistika mərkəzləri arasında müntəzəm uçuşlarda, xəstəxanalar arasında qan, dərman, peyvənd və tibbi nümunələrin çatdırılmasında istifadə ediləcək.
Bundan başqa, adalara və qış aylarında nəqliyyatın çətinləşdiyi yaşayış məntəqələrinə təchizatın təmin edilməsi də nəzərdə tutulur.
Sistem sənaye zonaları, fabriklər və limanlar arasında ehtiyat hissələrinin daşınmasına, həmçinin enerji xətləri, boru kəmərləri, dəmir və avtomobil yollarının uzun məsafəli monitorinqinə imkan verəcək.
Həvəskar uçuşlara icazə verilməyəcək
Abdulkadir Uraloğlu bildirib ki, yeni hava dəhlizlərindən yalnız müvafiq icazə və texniki tələblərə cavab verən PUA-lar istifadə edə biləcək.
Onun sözlərinə görə, bu dəhlizlər həvəskar uçuşlar üçün nəzərdə tutulmayıb. Uçuşları yalnız P2 lisenziyasına malik pilotlar SHGM-dən müvafiq əməliyyat icazələri almış şirkətlərin tərkibində həyata keçirə biləcəklər.
İstifadə olunacaq dronların qeydiyyatı, uzaqdan identifikasiya, coğrafi məhdudlaşdırma və tələb olunan proqram təminatı sertifikatlarına malik olması məcburi olacaq.
Hər uçuşdan əvvəl İHATTYS üzərindən müvafiq bildiriş göndəriləcək. Dəhlizlərin marşrutları ehtiyaclara uyğun olaraq aidiyyəti qurumlarla razılaşdırılacaq və sistem vasitəsilə ictimaiyyətə açıqlanacaq.
23:20 08.11.2026
Oxunuş sayı: 68
