Husilər Səudiyyə Ərəbistanının neft obyektlərini hədəfə alıb
Yəməndəki husilər Səudiyyə Ərəbistanının şərqində yerləşən Əbqaiq şəhərində “Saudi Aramco” şirkətinin obyektlərinə zərbə endirdiklərini bildiriblər.
Crossmedia.az xəbər verir ki, bu barədə husilərin “Ənsar Allah” hərəkatının hərbi nümayəndəsi Yəhya Səriya açıqlama verib. Məlumatı “TASS” yayıb.
Səriyanın sözlərinə görə, hücum birbaşa “Saudi Aramco” şirkətinin Əbqaiqdəki obyektlərini hədəf alıb və nəticədə ərazidə yanğın baş verib.
Hərəkatın nümayəndəsi, həmçinin Səudiyyə Ərəbistanının paytaxtındakı maliyyə mərkəzinə, eləcə də Yəmənin Əl-Cəvf, Marib və Ləhic əyalətlərində ərəb koalisiyasının hərbi qüvvələrinə zərbələr endirildiyini iddia edib.
Qeyd edək ki, bundan əvvəl şənbə günü Yəhya Səriya husilərin Ər-Riyaddakı Kral Xalid Beynəlxalq Hava Limanına və “Saudi Aramco” obyektlərinə, eləcə də krallığın digər bölgələrindəki hədəflərə hücum etdiyini bildirmişdi.
Onun sözlərinə görə, hücumlar ərəb koalisiyasının Yəməndə yaşayış məntəqələrinə endirdiyi hava zərbələrinə cavab olaraq həyata keçirilib.
22:17 08.11.2026
Oxunuş sayı: 83
