Lora Lumer siyasi paylaşımlarına görə 60 min dollar qazandığı iddiası ilə gündəmə gəlib
ABŞ Prezidenti Donald Trampın tərəfdarı olan bloqer və fəal Lora Lumer siyasi mövzulu paylaşımlarını ödəniş qarşılığında etdiyi, lakin bunu reklam kimi açıqlamadığı iddiası ilə ittiham olunur.
Crossmedia.az “The Washington Post” nəşrinə istinadən xəbər verir ki, Trampın 2024-cü il seçki kampaniyasının müşaviri Aleks Brüzevits və daha üç anonim sifarişçi Lumerin “X” sosial şəbəkəsindəki siyasi paylaşımlarından ən azı 60 min dollar qazandığını bildiriblər.
Nəşrin iki həmsöhbətinin sözlərinə görə, Lumer bir tvit üçün 3-5 min dollar, bəzi hallarda isə daha çox məbləğ tələb edir.
Lumer isə özünü jurnalist və fəal kimi təqdim edərək siyasi gündəmin təbliği müqabilində pul alan influenser olması ilə bağlı iddiaları rədd edib. O, Brüzevitsin ona qısa araşdırma hazırlamaq üçün pul ödədiyini, həmin işi yerinə yetirdikdən sonra sənədi yaydığını bildirib.
“Mənim biznesim ictimaiyyətlə əlaqələr və rəqiblər haqqında araşdırmalardır. Həmçinin media şirkətim var. Amerikada dolanışıq üçün pul qazanmaq qanunla qadağan edilməyib”, – deyə Lumer vurğulayıb.
33 yaşlı bloqer Trampın səfərlərində onu müşayiət edib və prezidentin ikinci hakimiyyət müddətində Ağ Evin Oval kabinetində onunla təkbətək görüşüb. ABŞ administrasiyasındakı bəzi şəxslər isə Lumerin açıq tənqidlərindən sonra Müdafiə və Milli Təhlükəsizlik nazirliklərinin bir neçə yüksək vəzifəli rəsmisinin işdən çıxarılmasından narazılıqlarını bildiriblər.
Lumerin “X” hesabının 1,9 milyon izləyicisi var. ABŞ Federal Ticarət Komissiyası bloqerlərdən reklam qarşılığında aldıqları ödənişləri açıqlamağı tələb etsə də, siyasi paylaşımlar bu qaydanın əhatə dairəsinə daxil deyil.
22:27 08.11.2026
Oxunuş sayı: 86
