Danışan məzarlar - Şəhidlər Xiyabanından reportaj
Bu gün 20 Yanvardır. Düz 36 il bundan əvvəl Bakıya soxulan rus qoşunlarının günahsız, əliyalın azərbaycanlıları amansızcasına qətl etməsindən 36 il ötür. Düz 36 il bundan əvvəl qaranlıq, qanlı küçələrdə azadlıq doğuldu. Xalq o azadlığı qəhrəman oğulların, qadınların qanı bahasına qazandı. Silahlardan, tanklardan açılan hər atəşə tuş gəlmiş vətəndaş bizi azadlığa bir addım daha yaxınlaşdırırdı. Azərbaycan xalqı öz azadlığını belə qazandı. Bu gün o qanlı azadlıq gecəsindən 36 il ötür və xalq yavaş-yavaş şəhidlər xiyabanına axışaraq azadlığın səbəbkarlarını ziyarət edirlər. Mən də şəhidlər xiyabanı istiqamətində hərəkət edirəm. Hava olduqca soyuqdur. Bəlkə də, bu 1990-cı ilin soyuq yanvar gecəsində, küçələrdə soyuq havada qətl edilən insanları zərrə qədər də olsa anlamaq üçün tanrı tərəfindən məqsədli şəkildə edilmişdi. Xalq şəhidlər xiyabanına axışır, hələ də meydanlardadır. Qazandığı azadlıqdan yaratdığı güclü dövlətini şəhidlərinə göstərməyə gəlirlər.
Şəhidlər xiyabanındayam. Jurnalistlər üçün ayrılmış xüsusi ərazidən ziyarət edən insanları çəkir, xəbər hazırlayırıq. Dövlət orqanlarının nümayəndələri ardıcıl şəkildə ziyarətə gəlirlər. Azərbaycan Prezidenti yanında Təhlükəsizlik Şurasının katibi Ramil Usubov, Azərbaycan Respublikasının Prezidenti yanında Təhlükəsizlik Şurası katibinin müavini Mədət Quliyevi görürük. Sonra Azərbaycan Milli Məclisinin deputatları xiyabana ziyarətə gəlirlər. Öndə vitse-spikerlər Musa Qasımlı, Rafael Hüseynov, Əli Əhmədov onların ardında isə digər deputatlar qərənfillərlə pillələri qalxmağa başladılar. Dövlət orqanları nümayəndələrinin ziyarətindən sonra vətəndaşlar və jurnalistlər də ziyarətə başladı. Ziyarət üçün xiyabana girəndə yolun əks tərəfindən xiyabana gələn fiziki qüsurlu yaşlı qadın diqqətimi çəkdi. Qadın ağlayaraq şəhidlərə dualar edir, ara bir dayanır və sonra öz yavaş addımları ilə xiyabana gəlməyə davam etdi. Yaşlı qadın tək mənim yox, polis əməkdaşlarının da diqqətini çəkmişdi. İki polis əməkdaşı qadına yaxınlaşaraq yolu keçməsinə kömək edirlər.
Xalq öz bütövlüyünü birliyini qorumağı bacarmışdı. Bunu Şəhidlər Xiyabanında gördüyüm hər kiçik detalda bir az da başa düşdüm. Xiyabanın içinə, şəhid məzarlarının qarşısına keçdim. İnsanlar əllərində dəstə-dəstə qərənfillə məzarların qabağında dayanır, kövrəlirdi. Addım-addım, xiyabanın özündə ehtiva etdiyi vətəndaş məsuliyyətini, vətən qeyrətini hiss edərək addımlayan insanlar şəhidlərinə öz minnətdarlıqlarını bildirirdilər. 131 şəhidin hər birinin məzarını ziyarət etdikdən sonra əbədi məşəlin qarşısına gəlirik. Əbədi məşəl xalqımızın sönməz azadlıq alovunun atributu hesab edilir.
Şəhidlər Xiyabanından çıxırıq. Günün əhəmiyyətini, məsuliyyətini anlayaraq, Azərbaycan xalqının böyüklüyünü təkrar-təkrar dərk edərək ayrılırıq. Matəm günlərimiz qan yaddaşımız olmaqla yanaşı həm də bir qürur yeridir. Tökülən qanlar, alınan canlar bahasına durmayan, azadlığının hər zərrəsini tələb edən xalqımızın qaranlıq taleyidir.
12:49 20.01.2026
Oxunuş sayı: 1643
