Tramp, Putin və Si Cinpin ilk dəfə üçtərəfli görüş keçirə bilər
ABŞ Prezidenti Donald Tramp, Rusiya Prezidenti Vladimir Putin və Çin lideri Si Cinpin noyabrın 19-da tarixdə ilk dəfə üçtərəfli görüş keçirə bilərlər.
Crossmedia.az xəbər verir ki, “New York Post” qəzeti bu barədə məlumat yayıb.
Məlumata görə, danışıqların Çinin Şençjen şəhərində keçiriləcək Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində baş tutması planlaşdırılır.
Görüşün əsas mövzusu ABŞ, Rusiya və Çinin nüvə arsenallarının azaldılmasına dair mümkün razılaşmanın müzakirəsi olacaq.
Bundan əlavə, liderlərin İrandakı müharibə və Şimali Koreya ətrafında yaranmış vəziyyətə toxuna biləcəkləri bildirilir.
Ağ Ev rəsmilərinin sözlərinə görə, görüşün konkret razılaşmalarla nəticələnəcəyi gözlənilmir. Vaşinqton danışıqları nüvə silahlarına nəzarət üzrə gələcək müzakirələrin başlanğıc mərhələsi kimi qiymətləndirir.
Bildirilir ki, sammit çərçivəsində Ukraynadakı müharibə ilə bağlı ayrıca müzakirə nəzərdə tutulmayıb.
Həmçinin Tramp və Putin arasında ayrıca ikitərəfli görüşün keçirilməsi planlaşdırılmır.
Qeyd edək ki, noyabrın 18-19-da Şençjendə APEC-in 33-cü liderlər toplantısı keçiriləcək. Üç ölkə rəhbərinin mümkün görüşü beynəlxalq nüvə silahlarına nəzarət mexanizmlərinin gələcəyi baxımından mühüm əhəmiyyət daşıyır.
12:24 14.11.2026
Oxunuş sayı: 39
