ABŞ-də tanker sərnişin gəmisinə çırpılıb: 32 nəfər xəstəxanaya yerləşdirilib
ABŞ-nin Luiziana ştatında Missisipi çayında tanker sahildə dayanmış sərnişin gəmisinə çırpılıb. Hadisə nəticəsində 32 nəfər xəstəxanaya yerləşdirilib.
Crossmedia.az xəbər verir ki, “Associated Press” agentliyi bu barədə məlumat yayıb.
Hadisə noyabrın 13-də Yeni Orlean limanı yaxınlığında baş verib. “Atlantic Asphalt” adlı tanker limanda dayanmış “American Heritage” sərnişin gəmisinə çırpılıb.
Toqquşma nəticəsində beşmərtəbəli sərnişin gəmisi yana əyilərək qismən suya batıb.
Hadisə zamanı gəmidə 129 sərnişin və ekipaj üzvləri olub. Rəsmilərin məlumatına görə, ümumilikdə 180 nəfərin hamısı xilas edilib.
Xəsarət alan 32 nəfər xəstəxanaya çatdırılıb. Onların xəsarətlərinin həyati təhlükə yaratmadığı bildirilir.
Xilasetmə əməliyyatlarına ABŞ Sahil Mühafizəsi, polis, yanğınsöndürmə və liman xidmətlərinin əməkdaşları cəlb olunublar.
İlkin məlumatlara görə, tankerdə sükan idarəetmə sisteminin nasazlığı baş vermiş ola bilər. Bununla belə, qəzanın dəqiq səbəbi hələ müəyyən edilməyib.
Hadisə ilə bağlı araşdırmalara başlanılıb.
09:14 14.11.2026
Oxunuş sayı: 90
