Tramp ABŞ-də uçuşların dayanmasının səbəbini açıqlayıb
ABŞ Prezidenti Donald Tramp ölkə üzrə aviareyslərin kütləvi şəkildə dayandırılmasının köhnəlmiş hava hərəkətini idarəetmə avadanlıqları ilə bağlı ola biləcəyini bildirib.
Crossmedia.az xəbər verir ki, “Fox News” telekanalı bu barədə məlumat yayıb.
Trampın sözlərinə görə, ABŞ Federal Aviasiya Administrasiyasının (FAA) istifadə etdiyi infrastrukturun bəzi hissələrinin təxminən 55 yaşı var.
Prezident bildirib ki, avadanlıqların köhnəlməsi hava hərəkətinə nəzarət sistemində genişmiqyaslı nasazlığa səbəb olmuş ola bilər.
O, hadisənin kiberhücum və ya süni intellekt texnologiyaları ilə əlaqəli olduğunu düşünmədiyini vurğulayıb.
Tramp qeyd edib ki, aviasiya infrastrukturunun yenilənməsi məsələsi əvvəllər də Konqreslə müzakirə olunub, lakin zəruri avadanlıqların dəyişdirilməsi hələ tam həyata keçirilməyib.
Bu arada, ABŞ Federal Aviasiya Administrasiyası ölkə üzrə təyyarələrin havaya qalxmasına tətbiq edilən müvəqqəti qadağanı aradan qaldırıb.
Qeyd edək ki, noyabrın 13-də radar və rabitə sistemlərində yaranan nasazlıq səbəbindən ABŞ-də uçuşlar bir neçə saatlıq dayandırılmışdı.
Aviareyslərin bərpasına başlanılsa da, texniki nasazlığın yaratdığı gecikmələrin və uçuş ləğvlərinin təsirlərinin bir müddət davam edə biləcəyi bildirilir.
Hadisənin dəqiq səbəbləri ilə bağlı araşdırmalar davam etdirilir.
12:32 14.11.2026
Oxunuş sayı: 47
