Kanada Rusiyanın NATO ilə bağlı tələblərini rədd edib
Kanadanın Baş naziri Mark Karni ölkəsinin NATO müttəfiqlərindən heç birini müdafiəsiz qoymayacağını və Rusiyanın Şərqi Avropada təhlükəsizlik bufer zonası yaradılması ilə bağlı tələblərini qəbul etməyəcəyini bildirib.
Crossmedia.az xəbər verir ki, Mark Karni bu barədə jurnalistlərə açıqlama verib.
“Kanadanın NATO üzvü olaraq alyansın digər üzvlərindən hər hansı birini nə vaxtsa müdafiəsiz qoyması mümkün deyil”, – deyə Baş nazir vurğulayıb.
Karni Latviyada Kanadanın 2 500 hərbçisinin yerləşdirildiyini və ölkəsinin NATO-nun bu ərazidəki çoxmillətli briqadasına rəhbərlik etdiyini xatırladıb.
“Biz Rusiyaya təhlükəsizlik bufer zonası yaratmaq imkanı verməyəcəyik. Bunun keçmişdə hansı nəticələrə gətirib çıxardığını bilirsiniz. Tarixi yaxşı xatırlayırsınız”, – deyə o əlavə edib.
Kanada hökumətinin başçısı bununla ölkəsinin NATO-nun kollektiv müdafiə prinsiplərinə sadiqliyini bir daha ifadə edib.
Qeyd edək ki, Rusiyanın Ukrayna ilə bağlı sülh danışıqlarında NATO qüvvələrinin Şərqi Avropadakı mövcudluğunun 1997-ci il səviyyəsinə qaytarılmasını tələb etdiyi barədə məlumatlar yayılıb.
10:50 14.11.2026
Oxunuş sayı: 74
