Qəhvə içməyin yeni faydası
Gündə 2-3 fincan kofeinli qəhvə içmək beyin sağlamlığına müsbət təsir göstərə və demensiya riskinin azalması ilə əlaqəli ola bilər.
Crossmedia.az xəbər verir ki, “Health” nəşri bu barədə məlumat yayıb.
“JAMA” elmi jurnalında dərc olunan tədqiqat çərçivəsində 131 821 nəfərin sağlamlıq göstəriciləri 43 ilədək izlənilib.
Araşdırma zamanı 11 033 iştirakçıda demensiya qeydə alınıb. Məlum olub ki, daha çox kofeinli qəhvə qəbul edən şəxslərdə demensiya riski az qəhvə içənlərlə müqayisədə 18 faiz aşağı olub.
Alimlərin fikrincə, bu əlaqə qəhvənin tərkibindəki kofein, antioksidantlar və digər bioloji aktiv maddələrlə bağlı ola bilər. Həmin maddələrin iltihab və oksidləşdirici stressin azalmasında müəyyən rol oynadığı ehtimal edilir.
Tədqiqatda ən əlverişli nəticələr gündə 2-3 fincan kofeinli qəhvə qəbul edən iştirakçılarda müşahidə olunub. Kofeinsiz qəhvə ilə demensiya riskinin azalması arasında isə əhəmiyyətli əlaqə müəyyən edilməyib.
Mütəxəssislər qəhvəni həddindən artıq şəkər, şərbət və şirin qaymaq əlavə etmədən içməyi tövsiyə edirlər. Yuxu keyfiyyətinə mənfi təsirin qarşısını almaq üçün kofein qəbulunu günün birinci yarısına salmaq da məqsədəuyğun hesab olunur.
Bununla belə, alimlər vurğulayırlar ki, tədqiqat qəhvə istehlakı ilə demensiya riskinin azalması arasında əlaqə müəyyən etsə də, qəhvənin xəstəliyin qarşısını birbaşa aldığını sübut etmir.
12:21 14.11.2026
Oxunuş sayı: 154
