İran ABŞ siyasi elitasında “ova” başlayır? – Əvvəl nazir, sonra Tramp…
ABŞ və İran arasında gərginlik fonunda Ağ Ev rəhbəri Donald Trampa qarşı mümkün hücum iddiaları yenidən gündəmə gəlib. Məlumatlara görə, İsrail İranın ABŞ Prezidentinə pilotsuz uçuş aparatları vasitəsilə hücum hazırladığı barədə ABŞ Mərkəzi Kəşfiyyat İdarəsinə (MKİ) xəbərdarlıq edib. Digər tərəfdən, İran rəsmiləri dəfələrlə Ali dini liderin qisasının alınacağını bəyan ediblər. Bu açıqlamalar Vaşinqton-Tehran münasibətlərində təhlükəsizlik risklərini və qarşılıqlı təhdidlərin miqyasını yenidən diqqət mərkəzinə gətirir.
Bu fonda İranın dəfələrlə səsləndirdiyi qisas bəyanatları yenidən gündəmə gəlir. Xüsusilə, İranın ali dini liderinin öldürülməsindən sonra Tehranın qisas alacağına dair açıqlamaları ABŞ və İsrail üçün təhlükəsizlik narahatlıqlarını artırıb. Lakin İsrailin ötürdüyü məlumatların hələlik müstəqil şəkildə təsdiqlənmədiyini də nəzərə almaq lazımdır.
Mövzu ilə bağlı Crossmedia.az-a açıqlama verən politoloq Elçin Xalidbəyli qeyd edib ki, hazırda baş verənlər siyasi-psixoloji təzyiq prosesinin tərkib hissəsidir: “Hər iki tərəf bir-birinə qarşı siyasi-psixoloji təzyiq, siyasi psixoloji təzyiq texnologiyalarından istifadə edirlər. ABŞ İrana qarşı hərbi əməliyyatların bərpa olunacağı barədə məlumatların dövriyyədə olmasında maraqlıdır. Çünki bu halda rəsmi Tehrana göstərilən təzyiq danışıqlar masasında Ağ Evin şərtlərinin qəbul olunması istiqamətində daha uyğun situasiya yarada bilər. Eyni zamanda bu texnologiyalardan rəsmi Tehran da istifadə edir. Rəsmi Tehran bəyan edir ki, İran ABŞ-nin yeni hərbi hücumlarına adekvat cavab verəcək. Bu, İranın danışıqlar masasında ABŞ-yə güzəşt etmək niyyətində olmadığını göstərir. Yəni bu baxımdan situasiya kifayət qədər qəlizdir. Təbii ki, bu prosesdə üçüncü tərəf də var: İsrail çalışır ki, Ağ Evdə gərginlik yaratmaqla ABŞ-nin İrana qarşı hərbi zərbələri bərpa etməsinə səbəblər yarada bilsin”.

Politoloq qeyd edib ki, bu baxımdan İsrail kəşfiyyatının Ağ Evdə xof yaratmaq siyasəti və cəhdləri eyni zamanda Trampın həyatına təhlükənin olması barədə məlumatların yayılması təbii ki, ABŞ-nin İrana hərbi zərbələrə inandırmaq kampaniyasının tərkib hissəsi kimi görünür: “Ancaq bu məlumatların nə qədər dəqiq olduğu hələlik məlum deyil. Bundan öncə də ABŞ-nin maliyyə naziri və digər administrasiya üzvlərinin də həyatına təhlükənin ola biləcəyi ilə bağlı məlumatlar yayılmışdı. Hazırda onlardan bəziləri ölkənin hərbi bazalarında yerləşdirilib və fəaliyyətlərini oradan davam edirlər. Yəni bütün bunlar böyük ölçüdə siyasi-psixoloji təzyiq kampaniyasının tərkib hissəsi kimi görünür, ancaq bu məlumatların hansı səviyyədə reallığa uyğun olduğu hələlik elə bir ciddi rəsmi təsdiqləmə açıqlamaları ilə özünü biruzə verməyib”.
Ayhan
19:00 16.11.2026
Oxunuş sayı: 41