Pentaqonda gizli məlumatları kim sızdırır? — Məxfi sənədlər - FOTOLAR
ABŞ Müdafiə Nazirliyində (Pentaqon) məxfi məlumatların mətbuata ötürülməsi ilə bağlı yeni qalmaqal yaranıb. ABŞ ordusunun general-leytenantı Brett Silviya İran və Ukraynadakı müharibələrlə bağlı məxfi məlumatları jurnalistlərə ötürməkdə ittiham olunur.
Crossmedia.az xəbər verir ki, bu barədə “Haber Global” nəşri məlumat yayıb.

Məlumata görə, ABŞ müdafiə naziri Pit Heqsetin oktyabrın sonunda vəzifəsindən azad etdiyi Brett Silviya barəsində hərbi məhkəmə prosesinin başlanması məsələsi gündəmdədir.
Pentaqonun keçmiş strategiya və planlaşdırma direktoru olan Silviyanın məxfi sənədlərdən qeydlər apardığı, jurnalistlərlə “Signal” tətbiqi vasitəsilə yazışdığı və sonradan həmin yazışmaları sildiyi iddia edilir.
Nəşr ABŞ tarixində baş vermiş ən böyük beş məxfi məlumat sızıntısını da xatırladıb:

1. WikiLeaks və müharibə sənədləri
ABŞ ordusunun kəşfiyyat analitiki Çelsi Meninq yüz minlərlə məxfi sənədi WikiLeaks platformasına ötürüb. İraq və Əfqanıstan müharibələri ilə bağlı materiallar, diplomatik yazışmalar və hərbi əməliyyatların təfərrüatları ictimaiyyətə açıqlanıb. 2007-ci ildə Bağdadda ABŞ helikopterindən açılan atəş nəticəsində mülki şəxslərin və “Reuters” agentliyinin iki əməkdaşının öldürülməsini əks etdirən video da yayımlanıb.

2. Edvard Snouden və qlobal dinləmə sistemi
ABŞ Milli Təhlükəsizlik Agentliyinin keçmiş əməkdaşı Edvard Snoudenin açıqladığı sənədlər ABŞ kəşfiyyatının milyonlarla insanın telefon danışıqları və internet əlaqələri barədə məlumat topladığını üzə çıxarıb. PRISM və XKeyscore proqramları vasitəsilə həyata keçirilən izləmə fəaliyyəti beynəlxalq diplomatik qalmaqala səbəb olub.

3. Discord üzərindən hərbi sirlərin yayılması
ABŞ Milli Qvardiyasının əməkdaşı Cek Teyşeyra yüzlərlə məxfi hərbi sənədi Discord platformasında paylaşıb. 2023-cü ilin aprelində üzə çıxan sənədlərdə Ukrayna müharibəsi, Rusiyaya dair kəşfiyyat məlumatları və ABŞ-nin müttəfiqlərini izləməsi ilə bağlı məlumatlar yer alıb. Teyşeyra 2024-cü ilin noyabrında 15 il müddətinə azadlıqdan məhrum edilib.

Beləliklə, Pentaqonda Brett Silviya ilə bağlı araşdırma ABŞ-də hərbi və kəşfiyyat məlumatlarının təhlükəsizliyi məsələsini yenidən gündəmə gətirib.
19:05 16.11.2026
Oxunuş sayı: 152