Firəngiz Əlizadə: aidiyyatı qurumlar məsələni həll etsin!
Noyabrın 13-də Milli Məclisin Mədəniyyət komitəsi “Prezident İlham Əliyevin VII Ümumdünya Mədəniyyətlərarası Dialoq Forumundakı çıxışından irəli gələn prioritetlər: Mədəniyyətlərarası dialoq və Azərbaycanın mədəni diplomatiyası” mövzusunda ictimai müzakirə keçirib. Dinləmədə iştirak edən Xalq artisti Firəngiz Əlizadə qeyd edib ki, gənc dirijorumuz musiqi baxımından dünyanın ən zəngin ölkələrindən biri olan İtaliyaya gedir və orada süni intellekt proqramları vasitəsilə yaradılmış musiqini Azərbaycan simfonik musiqisi kimi təqdim edir. Bunun adı nədir?
Məsələ ilə bağlı Crossmedia.az-a açıqlamasında Xalq artisti Firəngiz Əlizadə qeyd edib ki, o özü də bunu bilmir: “Elə həmin suala cavab tapa bilmədiyim üçün məsələni orada səsləndirdim. Mən çıxışım zamanı fikirlərimi çox açıq şəkildə ifadə etdim. Hətta deyə bilərəm ki, heç kimin çıxışı mənim çıxışım qədər açıq və iddialı olmadı. Mövcud problemləri və narazılıqları açıq şəkildə ortaya qoydum ki, aidiyyəti şəxslər bu məsələləri araşdırıb həll etsinlər. Mən artıq bu məsələlərlə bağlı fikirlərimi bildirmişəm və əlavə edəcəyim başqa bir məqam yoxdur. Bu problemlərin həlli kimin səlahiyyətindədirsə, sualları da məhz onlara ünvanlamaq lazımdır. Məsələlərin həlli ilə bağlı məsuliyyət daşıyan tərəflərdən cavab almaq daha doğru olar. Onu da xüsusi olaraq qeyd etmək istəyirəm ki, sözügedən hadisənin Mədəniyyət Nazirliyinə heç bir aidiyyəti yoxdur. Çünki həmin tədbirdə bizim musiqiçilərimiz və orkestrimiz iştirak etməyib. Orada müxtəlif konservatoriyalardan bir araya gəlmiş xarici musiqiçilərdən ibarət orkestr çıxış edib. Bizim musiqilərimiz də həmin proqramda səsləndirilməyib”.
Ayhan
17:59 16.11.2026
Oxunuş sayı: 80