Litva ABŞ-yə daimi hərbi baza yaradılması üçün təkliflər təqdim edib
Litva öz ərazisində ABŞ-nin daimi hərbi bazasının yaradılması məqsədilə Vaşinqtona rəsmi təkliflər paketi təqdim edib.
Crossmedia.az xəbər verir ki, "Anadolu" agentliyi bu barədə məlumat yayıb.
Litvanın müdafiə naziri Robertas Kaunas bildirib ki, təkliflər paketi artıq Amerika tərəfinə təqdim olunub və məsələ ilə bağlı danışıqlar davam edir.
"Təkliflər paketi müzakirə olunaraq təqdim edilib. Bu prosesi sadəcə məktub göndərib 'hə' və ya 'yox' cavabı almaq kimi qiymətləndirmək olmaz. Qarşıda uzunmüddətli danışıqlar dayanır", – deyə nazir vurğulayıb.
Kaunasın sözlərinə görə, ABŞ hərbçilərinin Litvada daimi yerləşdirilməsi ilə bağlı qərar yalnız hərbi imkanlardan və infrastrukturdan asılı olmayacaq. Hərbçilərin və onların ailələrinin yaşayış şəraitinin təmin edilməsi də əsas şərtlərdən biridir.
Nazir daha əvvəl ABŞ-nin NATO-dakı səfiri Metyu Uitakerlə bu məsələni müzakirə etdiyini açıqlayıb.
ABŞ Prezidenti Donald Tramp isə oktyabr ayında Litvada daimi Amerika hərbi bazasının yaradılması təklifinə baxılacağını bildirib.
Litva hökuməti ABŞ hərbçilərini daimi əsasda qəbul etməyə və hərbi bazanın saxlanılması xərclərini qarşılamağa hazır olduğunu bəyan edib.
Qeyd edək ki, ABŞ 2014-cü ildən Litvada rotasiya əsasında hərbi qüvvələr yerləşdirir. Noyabrın 16-da ölkəyə iki yeni Amerika hərbi batalyonunun yerləşdirilməsi ilə bağlı mərasim keçirilib.
17:47 16.11.2026
Oxunuş sayı: 72