Ukraynada nüvə qəzası riski artır – 38 ölkədən xəbərdarlıq
Ukraynada bu qış nüvə qəzasının baş verməsi riski artır. Nüvə təhlükəsizliyi üzrə 38 ölkənin tənzimləyici qurumları Rusiyanı Ukraynanın enerji infrastrukturuna hücumları dayandırmağa çağırıblar.
Crossmedia.az xəbər verir ki, "Reuters" agentliyi bu barədə məlumat yayıb.
Bildirilib ki, Rusiyanın Ukraynanın elektrik stansiyalarına, ötürücü xətlərinə və yarımstansiyalarına hücumları ölkənin enerji sisteminin dayanıqlığını zəiflədir.
Ekspertlərin əsas narahatlığı atom elektrik stansiyalarının sabit elektrik təchizatından məhrum olmasıdır. Belə vəziyyətdə nüvə yanacağının soyudulması çətinləşə və reaktorların aktiv zonasının əriməsi riski yarana bilər.
Bu isə 1986-cı ildə Çernobıl Atom Elektrik Stansiyasında baş vermiş qəzaya bənzər radioaktiv maddə sızması təhlükəsi doğura bilər.
Avropanın radioloji mühafizə və nüvə təhlükəsizliyi üzrə qurumları HERCA, WENRA və NORA birgə bəyanatlarında Rusiyanın hücumlarının nüvə təhlükəsizliyinə yaratdığı risklərdən ciddi narahatlıq ifadə ediblər.
"Biz Rusiyanın Ukraynanın nüvə obyektlərinə və onların təhlükəsiz fəaliyyəti üçün zəruri olan enerji infrastrukturuna hücumları dayandırmasının təcili zərurət olduğunu düşünürük", – deyə bəyanatda bildirilib.
HERCA və NORA-nın rəhbəri Per Strand "Reuters"ə müsahibəsində bildirib ki, son həftələr Rusiya daha böyük partlayıcı yük daşıyan və hədəfləri daha dəqiq vuran pilotsuz uçuş aparatlarından istifadə edir.
"Rusiyanın yeni taktikasına görə, nüvə qəzasının baş verməsi riski məhz bu qış ən yüksək səviyyədə olacaq", – deyə o vurğulayıb.
Strandın sözlərinə görə, ən təhlükəli ssenari Ukraynanın elektrik şəbəkəsində genişmiqyaslı kəsintinin baş verməsi və ölkədə fəaliyyət göstərən doqquz nüvə reaktorunun eyni vaxtda təsirlənməsidir.
"Radioaktiv maddələrin sızması ehtimalı olan doqquz reaktorun eyni vaxtda təhlükə ilə üzləşməsi son dərəcə ciddi vəziyyət yaradardı", – deyə ekspert bildirib.
O qeyd edib ki, belə bir vəziyyətin qarşısını almaq mümkündür. Bunun üçün Rusiyanın enerji infrastrukturuna hücumlarının dayandırılması vacibdir.
Ekspert həmçinin Avropa ölkələrini mümkün nüvə qəzasının nəticələrinə qarşı fövqəladə hazırlıq tədbirlərini gücləndirməyə çağırıb.
17:29 16.11.2026
Oxunuş sayı: 68