Ölkəmizin beynəlxalq aləmdə tutduğu yer xeyli yüksəkdir - Partiya sədri
Prezident İlham Əliyevin İrlandiyaya işgüzar səfəri və Avropa Siyasi Birliyinin 9-cu Zirvə Toplantısında iştirakı Azərbaycanın Avropa ilə münasibətlərinin inkişafı, beynəlxalq siyasi mövqelərinin möhkəmləndirilməsi və yeni tərəfdaşlıq imkanlarının formalaşdırılması baxımından mühüm əhəmiyyət daşıyır. Səfər çərçivəsində Prezidentin bir sıra dövlət və hökumət başçıları ilə keçirdiyi görüşlər, Ermənistanın baş naziri Nikol Paşinyanla təması, eləcə də Böyük Britaniya ilə Strateji Tərəfdaşlıq haqqında Birgə Bəyannamənin imzalanması diqqət çəkən məqamlardandır.
Xüsusilə, Böyük Britaniya ilə münasibətlərin strateji tərəfdaşlıq səviyyəsinə yüksəldilməsi, enerji, müdafiə, təhlükəsizlik, iqtisadiyyat və texnologiya sahələrində əməkdaşlığın genişləndirilməsi Azərbaycanın Avropa siyasi və iqtisadi məkanındakı mövqeyinə necə təsir göstərəcək? Digər tərəfdən, Avropa Siyasi Birliyinin Zirvə Toplantısı çərçivəsində Ermənistanla aparılan təmaslar Azərbaycan-Ermənistan münasibətlərinin normallaşması və regionda davamlı sülhün təmin olunması baxımından hansı perspektivlər yaradır?
Bütün bunları nəzərə alaraq, İrlandiya səfərini Azərbaycanın çoxşaxəli xarici siyasətinin nəticəsi kimi qiymətləndirmək olarmı? Bu görüşlərin və əldə olunan razılaşmaların ölkəmizin beynəlxalq nüfuzuna, Avropa ilə siyasi-iqtisadi əlaqələrinə və Cənubi Qafqazda geosiyasi mövqeyinə mümkün təsirlərini necə dəyərləndirirsiniz?
Mövzu ilə bağlı Crossmedia.az-a açıqlama verən Vətəndaş Həmrəyliyi Partiyasının sədri Sabir Rüstəmxanlı qeyd edib ki, Azərbaycanın Avropa Parlamenti və Fransa kimi bəzi Avropa ölkələri ilə münasibətlərində müəyyən problemlər yaşanıb: “Lakin hesab edirəm ki, bu problemlərin bir qismi artıq müəyyən mənada arxada qalıb. Hər halda, Azərbaycan bir dövlət olaraq beynəlxalq aləmdə gündən-günə daha aydın görünür və mövqelərini gücləndirir. Bunun çoxsaylı nümunələri var. Məsələn, 2023-cü ildə Ermənistanla bağlı məsələdə ABŞ-nin iştirakı ilə əldə olunan razılaşmalar, sənədin sülh müqaviləsi olmasa da, müəyyən siyasi nəticələrin qəbul edilməsi, Avropa ölkələrinin enerji təhlükəsizliyində Azərbaycanın artan rolu, Türkiyə ilə qardaşlıq münasibətlərimiz və Türk Dövlətləri Təşkilatının formalaşmasında Azərbaycanın fəal iştirakı bu baxımdan xüsusi əhəmiyyət daşıyır. Eyni zamanda, Türk Dövlətləri Təşkilatına üzv ölkələrin iqtisadi potensialı və təşkilatın beynəlxalq mövqeyi də Azərbaycanın rolunu artırır”.
S.Rüstəmxanlı qeyd edib ki, bütün bunlar cəmi 10 milyon əhalisi olan Azərbaycanın beynəlxalq münasibətlər sistemində öz demoqrafik və coğrafi göstəricilərindən daha böyük mövqeyə malik olduğunu göstərir: “Ölkəmizin beynəlxalq aləmdə tutduğu yer və siyasi çəkisi gözlənilən səviyyədən xeyli yüksəkdir. Bu baxımdan, Azərbaycanın Qarabağ müharibəsində qazandığı Zəfər, hazırda Qarabağda həyata keçirdiyi genişmiqyaslı quruculuq işləri və mürəkkəb geosiyasi coğrafiyada yürütdüyü balanslı siyasət mühüm rol oynayır. Hətta Ermənistanın ənənəvi tərəfdaşlarından biri olan Hindistanla münasibətlər fonunda Azərbaycanın müxtəlif ölkələrlə, o cümlədən iqtisadi və müdafiə sahələrində əməkdaşlığını genişləndirməsi də diqqətəlayiqdir. Məsələn, BƏƏ-nin müdafiə sənayesi şirkətlərinin Azərbaycanda fəaliyyət göstərmək istəyi və ölkəmizə investisiya marağı dövlətlərarası münasibətlərə təsir edən amillərdəndir. Bu gün dünyada iqtisadi maraqlar bir çox hallarda siyasi maraqlardan daha böyük rol oynayır. Ölkələr arasında münasibətlərin formalaşmasında iqtisadi əməkdaşlıq, investisiya imkanları və maliyyə maraqları mühüm əhəmiyyət kəsb edir. Hətta bir çox hallarda siyasi qərarların qəbuluna da iqtisadi amillər ciddi təsir göstərir. Azərbaycanın iqtisadi gücünün artması, Avropanın enerji təhlükəsizliyinə verdiyi töhfə, eləcə də yaşıl enerji sahəsində nəzərdə tutulan layihələr ölkəmizin beynəlxalq nüfuzunu daha da gücləndirir. Şübhəsiz ki, bu prosesdə Azərbaycan Prezidentinin şəxsi rolu və həyata keçirdiyi siyasət xüsusi əhəmiyyət daşıyır. Bununla yanaşı, hesab edirəm ki, ölkə daxilində də müəyyən məsələlərin həlli istiqamətində daha ciddi addımlar atılmalıdır. Əgər bəzi məmurlar öz vəzifələrini daha məsuliyyətlə yerinə yetirsələr, ölkənin daxili iqtisadi problemlərinin həllinə daha həssas və prinsipial yanaşsalar, Azərbaycanın beynəlxalq nüfuzu daha da güclənə bilər. Daxildə atılacaq zəruri addımlar ölkəmizin xarici siyasətdə qazandığı uğurları daha da möhkəmləndirər”.
Ayhan
17:30 14.11.2026
Oxunuş sayı: 128
