Hər həftə incəsənətlə məşğul olmaq bioloji qocalmanı ləngidə bilər – araşdırma
Alimlər müəyyən ediblər ki, incəsənətlə müntəzəm təmasda olmaq bioloji qocalma prosesinin daha yavaş getməsi ilə əlaqəli ola bilər. Araşdırmaya görə, həftədə ən azı bir dəfə mədəni fəaliyyətlərdə iştirak edən insanlarda qocalma göstəriciləri daha aşağıdır.
Crossmedia.az xəbər verir ki, bu barədə UNIAN məlumat yayıb.
London Universitet Kollecinin professoru Deyzi Fankortun həmmüəllifi olduğu araşdırmada Böyük Britaniyada yaşayan 3556 yetkin şəxsin vərdişləri qan analizlərinin nəticələri ilə müqayisə edilib. 2026-cı il mayın 11-də dərc olunan tədqiqat çərçivəsində alimlər DNT-də yaşla dəyişən kimyəvi markerləri araşdıraraq iştirakçıların bioloji yaşını və qocalma sürətini qiymətləndiriblər.
Araşdırmada incəsənətlə təmas dedikdə mahnı oxumaq, rəqs etmək, fotoşəkil çəkmək kimi fərdi fəaliyyətlərlə yanaşı, sərgilərə, kitabxanalara və tarixi abidələrə baş çəkmək də nəzərdə tutulub.
Həftədə ən azı bir dəfə belə fəaliyyətlərlə məşğul olduğunu bildirən şəxslərdə qocalma sürətini göstərən göstəricilər bu fəaliyyətləri ildə bir-iki dəfə həyata keçirənlərlə müqayisədə bir neçə faiz aşağı olub. Tədqiqat müəlliflərinin sözlərinə görə, fərq fiziki məşqləri müntəzəm edən və etməyən insanlar arasındakı fərqə bənzəyib. Bu nəticə gəlir, təhsil, siqaret çəkmə və bədən kütləsi indeksi nəzərə alındıqdan sonra da müşahidə edilib.
Digər testin nəticələrinə əsasən, incəsənətlə həftədə ən azı bir dəfə təmasda olan insanların bioloji yaşı bu fəaliyyətlərlə nadir hallarda məşğul olanlardan orta hesabla təxminən bir il az olub.
Deyzi Fankortun fikrincə, incəsənət fəaliyyətləri sağlamlığa müxtəlif yollarla təsir göstərə bilər. Məsələn, kollektiv şəkildə mahnı oxumaq sosial ünsiyyəti artırır, rəqs fiziki aktivliyi təmin edir, rəsm çəkmək isə diqqət və emosiyaları cəlb edir. Araşdırmada müxtəlif fəaliyyət növləri ilə məşğul olan şəxslərdə daha yaxşı nəticələrin müşahidə edilməsi də bu ehtimalı dəstəkləyir.
Nəşrin yazdığına görə, incəsənətlə məşğul olmaq stressi azaltmağa kömək edə bilər. Uzunmüddətli stress isə bioloji qocalmanın sürətlənməsi ilə əlaqələndirilir. Əvvəlki araşdırmalarda incəsənət fəaliyyətlərinin iltihabi proseslərin azalması ilə əlaqəsi də qeyd olunub.
04:00 09.11.2026
Oxunuş sayı: 37
