Türkiyənin yeni sualtı silahı: LÜFER elektron müharibə şəraitində də işləyir
Türkiyəli mühəndislər 15 kilometr məsafədə fəaliyyət göstərə bilən, fiber-optik kabel vasitəsilə idarə olunan LÜFER adlı sualtı kəşfiyyat və hücum aparatı hazırlayıblar.
Crossmedia.az xəbər verir ki, bu barədə “TRT Haber” məlumat yayıb.
İstanbul Texniki Universitetinin (İTÜ) nəzdində fəaliyyət göstərən DATUM müdafiə sənayesi şirkətinin hazırladığı LÜFER və KOFANA pilotsuz dəniz sistemləri TURNAs-2026 pilotsuz sistemlər təlimində sınaqdan keçirilib. Hər iki sistem onlara verilən tapşırıqları uğurla yerinə yetirib.
İTÜ-nün müəllimi Münir Cansın Özdenin sözlərinə görə, LÜFER sualtı kəşfiyyat və hücum aparatıdır. Kiçik ölçülərə malik sistem bir nəfər dəniz komandosunun rahatlıqla istifadə edə biləcəyi formada hazırlanıb. Onun çəkisinin təxminən avtomatik tüfəngin çəkisinə yaxın olduğu bildirilir.
Aparat 15 kilometrlik fiber-optik kabel vasitəsilə idarə olunur. Bu texnologiya elektron müharibənin intensiv tətbiq edildiyi şəraitdə belə sistemin fəaliyyətini davam etdirməsinə imkan verir.
LÜFER üzərindəki kamera vasitəsilə kəşfiyyat, müşahidə və məlumat toplama tapşırıqlarını yerinə yetirə bilir. Hücum zamanı isə kamikadze aparatı kimi istifadə olunur. Onun ön hissəsində yerləşdirilən partlayıcı qurğu hədəfi sıradan çıxarmaq üçün nəzərdə tutulub.
Münir Cansın Özden bildirib ki, LÜFER-in əsas məqsədi düşmən gəmisini batırmaq deyil. Aparat gəminin sükan və ya pərvanə hissələrini hədəfə alaraq onun fəaliyyət qabiliyyətini məhdudlaşdırmaq üçün hazırlanıb. Bu hissələrə zərbə endirilməsi gəmi batmasa belə, onu müəyyən müddətə döyüş imkanlarından məhrum edə bilər.
Mütəxəssisin sözlərinə görə, LÜFER gəmidən, helikopterdən, rezin qayıqdan və ya sahildəki mövqedən suya buraxıla bilər. Aparatın yaxın zamanda Türkiyə Silahlı Qüvvələrinin arsenalına daxil edilməsi gözlənilir. Layihəyə xarici ölkələrdən də ciddi maraq olduğu bildirilir.
23:12 02.11.2026
Oxunuş sayı: 52
