“Məkkə sazişi” Türkiyə parlamentinin gündəliyinə çıxarılır
Türkiyə, Pakistan və Səudiyyə Ərəbistanı arasında imzalanmış “Məkkə Birgə Müdafiə Sazişi”nin təsdiqini nəzərdə tutan qanun layihəsi noyabrın 5-də Türkiyə Böyük Millət Məclisinin (TBMM) Baş Assambleyasında müzakirə olunacaq.
Crossmedia.az xəbər verir ki, bu barədə “TRT Haber” məlumat yayıb.
Məlumata görə, hakim Ədalət və İnkişaf Partiyasının (AK Parti) mənbələri qanun layihəsinin çərşənbə günü parlamentin plenar iclasına çıxarılacağını bildiriblər. Sənəd Türkiyə, Pakistan və Səudiyyə Ərəbistanı arasında birgə müdafiə sazişinin təsdiq edilməsinin məqsədəuyğun hesab olunmasına dair qanun layihəsidir.
Qeyd edək ki, “Məkkə Birgə Müdafiə Sazişi” tərəflərdən birinə qarşı xarici mənbədən silahlı hücumun bütün iştirakçılara qarşı hücum kimi qəbul edilməsini nəzərdə tutur. Sazişə əsasən, digər tərəflər hücuma məruz qalan ölkəyə hərbi imkanlar da daxil olmaqla, mövcud potensialları çərçivəsində yardım göstərməlidirlər.
Sənəddə, həmçinin saziş qüvvəyə mindikdən sonra ilk 10 il ərzində tərəflərin razılaşmadan çıxa bilməyəcəyi müddəası yer alır. Türkiyə parlamentinin Xarici Əlaqələr Komissiyası qanun layihəsini oktyabrın 27-də qəbul edib.
23:05 02.11.2026
Oxunuş sayı: 50
