Tokayev: Qazaxıstana zərər vurmağa çalışanlar məsuliyyətə cəlb ediləcək
Qazaxıstan Prezidenti Kasım-Jomart Tokayev ölkədə millətlərarası və dinlərarası həmrəyliyin qorunmasına, eləcə də sabitliyin təmin edilməsinə sadiq olduqlarını bildirib. O, ölkəyə zərər vurmağa çalışan şəxslərin qanun qarşısında cavab verəcəyini vurğulayıb.
Crossmedia.az xəbər verir ki, Tokayev bu fikirləri Temirtau şəhərində Qarmet şirkətinin kollektivi və həmkarlar ittifaqının üzvləri ilə görüşündə səsləndirib. Prezidentin sözlərini onun mətbuat xidməti yayıb.
Dövlət başçısı bildirib ki, xalqın maraqlarına xidmət edən islahatların uğurla davam etdirilməsi üçün ölkədə sülh və sabitlik qorunmalıdır. O, Qazaxıstana zərər vurmağa çalışan şəxslərin “qanun və qayda” prinsipinə uyğun olaraq məsuliyyətə cəlb ediləcəyini qeyd edib.
Tokayev, həmçinin Qazaxıstanın bütün qonşu və maraqlı dövlətlərlə əməkdaşlığı inkişaf etdirməyə davam edəcəyini bildirib. Onun sözlərinə görə, ölkə beynəlxalq sülhün və təhlükəsizliyin möhkəmləndirilməsinə töhfə vermək niyyətindədir.
21:19 02.11.2026
Oxunuş sayı: 61
