Türkiyə, Səudiyyə Ərəbistanı və Pakistanın müdafiə sazişi parlamentdə müzakirə olunacaq
Türkiyə, Səudiyyə Ərəbistanı və Pakistan arasında imzalanan “Məkkə Birgə Müdafiə Sazişi”nin təsdiqlənməsi haqqında qanun layihəsinin noyabrın 4-də Türkiyə Böyük Millət Məclisinin (TBMM) plenar iclasında müzakirəsi planlaşdırılır.
Crossmedia.az xəbər verir ki, Türkiyə Böyük Millət Məclisinin məlumatına əsasən, sazişin təsdiqini nəzərdə tutan qanun layihəsi artıq parlamentin Xarici İşlər Komissiyasında qəbul edilib.
2026-cı il avqustun 7-də Məkkədə imzalanan saziş üç ölkə arasında hərbi əməkdaşlığın genişləndirilməsini və kollektiv müdafiə mexanizminin gücləndirilməsini nəzərdə tutur.
Razılaşmaya əsasən, tərəflərdən birinə silahlı hücum bütün iştirakçı dövlətlərə qarşı hücum kimi qiymətləndiriləcək. Saziş hərbi koordinasiya, kəşfiyyat məlumatlarının mübadiləsi və müdafiə sənayesi sahəsində əməkdaşlığı da əhatə edir.
Lakin sənəd Türkiyədə siyasi mübahisələrə səbəb olub.
Müxalifət nümayəndələri sazişin ölkənin milli maraqlarına uyğun olmadığını və Türkiyənin Yəməndəki hərbi münaqişəyə cəlb edilməsi riskini artırdığını bildiriblər.
Hakimiyyət nümayəndələri isə razılaşmanın müdafiə xarakteri daşıdığını, heç bir ölkəyə qarşı yönəlmədiyini və regional təhlükəsizliyin gücləndirilməsinə xidmət etdiyini vurğulayıblar.
Qeyd edək ki, qanun layihəsi oktyabrın 27-də TBMM-nin Xarici İşlər Komissiyasında qəbul olunub. Sazişin Türkiyə tərəfindən təsdiqlənməsi üçün parlamentin plenar iclasında da müvafiq qərarın qəbul edilməsi tələb olunur.
17:46 02.11.2026
Oxunuş sayı: 53
