Trampın sülh maskasının arxasında İrana hücum planı? – Tehran yeni müharibəyə hazırlaşır!
ABŞ və İran arasında diplomatik gərginlik yenidən hərbi qarşıdurma ehtimalını gündəmə gətirir. ABŞ Prezidenti Donald Tramp bir tərəfdən müharibənin başa çatması ilə bağlı nikbin açıqlamalar verir, digər tərəfdən isə İrana qarşı yeni bombardman kampaniyası ehtimalını nəzərdən keçirir. Trampın İsrailin Baş naziri Benyamin Netanyahu ilə telefon danışığı aparması da Vaşinqtonun növbəti addımları ilə bağlı sualları artırır. Bütün bunlar ABŞ administrasiyasının İranla bağlı strategiyasının hansı istiqamətdə inkişaf edəcəyi və mümkün hərbi əməliyyatların regionda hansı nəticələrə səbəb olacağı məsələsini aktuallaşdırır. Bir tərəfdən sülh perspektivindən danışan, digər tərəfdən isə İrana qarşı yeni bombardman planlarını nəzərdən keçirən Trampın əsas məqsədi nədir?
Siyasi şərhçi Vüsal Məmmədov Crossmedia.az-a açıqlamasında qeyd edib ki, Trampın sözləri, bəyanatları heç vaxt onun real niyyətini ifadə etmir: “Tramp bir tərəfdən sülhdən danışıb, o biri tərəfdən “vur” əmrini verə bilər. Hazırda bütün əlamətlər İrana qarşı hərbi əməliyyatlara hazırlığın getdiyinə işarə edir. Əslində İsrail oktyabrın əvvəlində İrana genişmiqyaslı zərbələr endirməyə hazır idi. Lakin ABŞ prezidenti Donald Tramp əməliyyatın 3 noyabr seçkisindən sonraya keçirilməsini tələb edib. ABŞ mediasının yazdığına görə, zərbələrin əsas hədəfi İranın elektrik stansiyaları, raket qurğuları və nüvə obyektləri olacaq. Ağ Evdə təxminən 3 günlük şiddətli zərbələrin İranın qoyulan şərtlərlə razılaşmasına kifayət edəcəyini düşünürlər. Oktyabrın 19-da ABŞ-nin müharibə naziri Pit Heqsett “Ovda” hərbi aviabazasında İsrailin baş naziri Netanyahu ilə görüşəndə İsrail qırıcıları İran sərhədlərinə qədər uçub, geri qayıtdılar. Ekspertlər bunu “İrana yeni zərbələrin məşqi” adlandırırlar”.
V.Məmmədov qeyd edib ki, artıq Amerika İordaniya, Qətər və Küveytdəki bazalardakı hərbçilərinin sayını azaltmağa başlayıb: “Fevral ayında İrana qarşı əməliyyatlardan əvvəl də itkiləri azaltmaq üçün eynilə buna oxşar vəziyyət müşahidə olunmuşdu. ABŞ-İsrail cütlüyünün müharibəyə hazırlaşdığını İranda da başa düşür və hazırlıqlarını görürlər. Məsələn, Tehran Hörmüz boğazının dibi ilə gedən optik internet xətlərini kəsməyə hazırlaşır. Bu arada İslam İnqilabı Keşikçiləri Korpusu ölkənin qərbindəki Kürdüstan əyalətinin bir neçə bölgəsinə böyük bölmələr və hərbi texnika yerləşdirməyə başlayıb. Görünür, Amerika ilə İsrailin yenidən “kürd kartı”nı oynayacağını düşünür və əvvəlcədən buna hazır olmaq istəyirlər”.
Ayhan
17:00 02.11.2026
Oxunuş sayı: 227
