Məhkumların peşə təhsilində yeni mərhələ
Cəzaçəkmə müəssisələrinin nəzdində fəaliyyət göstərən peşə təhsili müəssisələrində tədrisin təşkili, Pedaqoji Şuranın tərkibi və səlahiyyətləri ilə bağlı yeni qaydalar müəyyənləşib.
Crossmedia.az xəbər verir ki, bu, “Cəzaçəkmə müəssisələrinin nəzdində fəaliyyət göstərən peşə təhsili müəssisələrinin Pedaqoji Şurası haqqında Əsasnamə”də əksini tapıb.
Əsasnaməyə əsasən, Pedaqoji Şura müəssisənin ali idarəetmə orqanı olacaq. Şuranın tərkibinə müəssisənin direktoru, tədris və təlim işləri üzrə direktor müavini, baş usta, müəllimlər, istehsalat təlimi ustaları, eləcə də cəzaçəkmə müəssisəsinin rəhbərliyinin nümayəndələri daxil ediləcək.
Şura peşə təhsili müəssisələrində tədrisin keyfiyyətinin artırılması, təhsil proqramlarının təkmilləşdirilməsi, yeni ixtisasların açılması və tələbə qəbulunun əmək bazarının tələbatına uyğunlaşdırılması ilə bağlı qərarlar qəbul edəcək.
Bununla yanaşı, təhsilalanların əmək bazarının tələblərinə uyğun bilik və bacarıqlara yiyələnməsi, ümumi və peşə kompetensiyalarının inkişaf etdirilməsi, ömürboyu təhsil imkanlarının genişləndirilməsi istiqamətində təkliflər müzakirə olunacaq. Cəzaçəkmə müəssisələrində peşə təhsili proqramları əmək bazarının tələblərinə uyğunlaşdırılacaq.
Qaydalara əsasən, Şura üzvlərinin səsvermə zamanı bitərəf qalmasına icazə verilməyəcək. Qərarlar iclasda iştirak edən üzvlərin sadə səs çoxluğu ilə qəbul ediləcək. Səslər bərabər olduqda Şura sədrinin səsi həlledici olacaq. Şuranın iclasları tədris ili ərzində azı dörd dəfə keçiriləcək. Növbədənkənar iclaslar Şura sədrinin təşəbbüsü və ya üzvlərin azı üçdə birinin yazılı müraciəti əsasında çağırıla biləcək.
Qəbul edilən qərarlar müəssisənin direktoru tərəfindən təsdiqlənəcək və onların icrası müəssisə və onun rəhbəri üçün məcburi olacaq. Eyni zamanda, Şuranın qanunvericiliyə zidd və ya prosedur pozuntusu ilə qəbul etdiyi qərarlar müəssisənin tabe olduğu dövlət orqanı tərəfindən ləğv edilə biləcək. Şuranın qərarlarından inzibati qaydada və ya məhkəməyə müraciət etməklə şikayət vermək də mümkün olacaq.
15:19 02.11.2026
Oxunuş sayı: 58
