Ərdoğan Cənubi Koreyaya nüvə əməkdaşlığı təklif edib
Türkiyə Prezidenti Rəcəb Tayyib Ərdoğan Cənubi Koreyanı Sinopda tikilməsi planlaşdırılan atom elektrik stansiyası layihəsi üçün mühüm potensial tərəfdaş adlandırıb.
Crossmedia.az xəbər verir ki, Ərdoğan bu barədə Cənubi Koreyanın “Yonhap” xəbər agentliyinə müsahibəsində bildirib.
Türkiyə liderinin sözlərinə görə, Qara dəniz sahilində yerləşən Sinopda ölkənin ikinci atom elektrik stansiyasının tikintisi nəzərdə tutulur.
“Biz Koreya Respublikasını bu layihədə böyük potensiala malik tərəfdaş hesab edirik”, – deyə Ərdoğan vurğulayıb.
O bildirib ki, Türkiyə Cənubi Koreyanın dövlət enerji şirkəti KEPCO ilə layihənin texniki və iqtisadi imkanlarını araşdırır.
Ərdoğan qeyd edib ki, yekun qərar maliyyələşmə şərtləri, elektrik enerjisinin istehsal xərcləri və layihənin Türkiyə iqtisadiyyatına verəcəyi töhfələr nəzərə alınmaqla qəbul ediləcək.
Prezident iki ölkə arasında müdafiə sənayesi, yarımkeçiricilər, robototexnika, süni intellekt və logistika sahələrində əməkdaşlığın genişləndirilməsinə də çağırıb.
O, Cənubi Koreya şirkətlərini Türkiyəyə daha çox sərmayə yatırmağa, birgə istehsal və texnologiya layihələrində iştirak etməyə dəvət edib.
Ərdoğan həmçinin Türkiyə ilə Cənubi Koreya arasında ikitərəfli ticarət dövriyyəsinin 15 milyard ABŞ dollarına çatdırılmasının hədəfləndiyini bildirib
14:35 02.11.2026
Oxunuş sayı: 59
