Beynəlxalq mediada, xüsusilə "Reuters" agentliyində yayılan son təhlillərə görə, ABŞ Konqresinə keçiriləcək növbədənkənar aralıq seçkilərində Demokratlar Partiyasının həm Nümayəndələr Palatasında, həm də Senatda üstünlüyü ələ keçirmək şansları olduqca yüksək qiymətləndirilir. Respublikaçıların ikiillik mütləq nəzarətindən sonra demokratların hakimiyyətin qanunverici qolunu yenidən ələ keçirmək ehtimalı Ağ Evin xarici siyasətində, xüsusən də Ukrayna cəbhəsində və Yaxın Şərq strategiyasında köklü dönüş yarada bilər. Demokratlar respublikaçıları Tramp administrasiyasına mühüm müharibə qərarlarında və büdcə vəsaitlərinin bölgüsündə həddindən artıq müstəqil şəkildə hərəkət etməyə imkan verməkdə günahlandırırlar.
Bu barədə
Crossmedia.az-a açıqlama verən
politoloq Elçin Xalidbəyli Konqres seçkilərinin daxili və xarici siyasət üçün həlledici xarakterini, Trampın qarşılaşacağı konstitusion maneələri və Vaşinqtonun Moskva ilə münasibətlərində gözlənilən böyük dəyişiklikləri ətraflı şərh edib:
"Aralıq seçkiləri Respublikaçılar üçün, xüsusilə də Tramp administrasiyası üçün həlledici xarakter daşıyır. Çünki bu seçkilərdə məğlubiyyət baş verərsə, Respublikaçılar parlamentə nəzarəti itirmiş olacaqlar. Nəticədə üstünlük qazanan Demokratlar Tramp administrasiyasının qəbul etdiyi bir çox qərarlara veto qoyulmasl və ya bloklanması imkanlarını əldə edəcəklər. Tramp administrasiyası nə ölkə xaricində, nə də ölkə daxilində sərbəst şəkildə qərar qəbul edib reallaşdırmaq şansına malik olacaq. Əgər aralıq seçkilərində Demokratlar qalib gələrsə, Prezident Donald Trampın "topal ördək"vəziyyətinə düşməsi qaçılmaz olacaq".
Politoloq xarici siyasət qərarlarında Senatın və Nümayəndələr Palatasının fərqli rollarını, Ağ Evin müdafiə taktikalarını vurğulayıb:
"Tramp səlahiyyətlərini icra etməkdə ciddi çətinlik çəkən bir prezidentə çevriləcək, onun qəbul etdiyi qərarları parlament bloklayacaq. Ölkədaxili bir çox məsələlərin həllində Nümayəndələr Palatasının önəmi daha böyük olsa da, ölkə xarici proseslərdə, xüsusilə hərbi xarakterli qərarların qəbulunda Senatdakı üstünlük daha böyük əhəmiyyət kəsb edir. Hazırda Respublikaçılar aralıq seçkilərini uduzacaqlarını anlayaraq Nümayəndələr Palatasındakı məğlubiyyətlə barışmış kimi görünürlər və bütün qüvvələrini Senatdakı üstünlüklərini qorumağa yönəldiblər".
Elçin Xalidbəyli seçkilərin seçkilərdən sonra Yaxın Şərq və Ukrayna cəbhəsində ola biləcəklərdən də danışıb:
"İstənilən halda indidən məlumdur ki, Demokratlar qalib gələrsə, Tramp administrasiyasının Ukrayna və Yaxın Şərqlə bağlı mövqeyi indiki məzmununu kəskin şəkildə dəyişə bilər. Demokratların təzyiqi Yaxın Şərqdəki savaşla bağlı, eyni zamanda Rusiya-Ukrayna müharibəsinə yönəlik ABŞ-nin indiki mövqeyini, xüsusilə də Vaşinqtonun Rusiya ilə yaxınlaşma prosesini tamamilə bloklaya bilər. Bu da o deməkdir ki, aralıq seçkilərindən sonra həm Donald Trampın siyasi statusunda və prezident kimi fəaliyyətində, həm də Birləşmiş Ştatların qlobal xarici siyasət kursunda ciddi geosiyasi dəyişikliklərin baş verəcəyi qətiyyən istisna deyil".
Zeynəb Həsən
