Cənubi Qafqaz
"Dövlətlər saziş imzalayır, etimadı xalqlar qurur!": Pezeşkiana tarixi müraciətin pərdəarxası
Azərbaycanın vətəndaş cəmiyyəti təşkilatlarının nümayəndələri İran İslam Respublikasının Prezidenti Məsud Pezeşkiana açıq məktubla müraciət edərək, onun Azərbaycana və Prezident İlham Əliyevə bəslədiyi müsbət münasibəti, eləcə də mehriban qonşuluq siyasətinə verdiyi önəmi yüksək qiymətləndiriblər. Bu müraciət sadəcə xoşramlı bir addım deyil; əsas məqsəd vətəndaş cəmiyyətinin Bakı və Tehran arasında formalaşan yeni siyasi mühitə verdiyi ictimai dəstəyi nümayiş etdirmək, dövlətlərarası etimadın möhkəmləndirilməsində xalq diplomatiyasının rolunu önə çıxarmaqdır.
Vətəndaş cəmiyyətinin bu müraciəti Azərbaycan-İran münasibətlərində etimadın möhkəmləndirilməsi baxımından hansı mesajı verir və QHT-lər iki ölkə arasında siyasi dialoqun inkişafına necə töhfə verə bilər?
Məsələ ilə bağlı Crossmedia.az-a açıqlama verən Beynəlxalq Avrasiya Mətbuat Fondunun (BAMF) prezidenti Umud Mirzəyev müraciətin strateji əhəmiyyətini, xalq diplomatiyasının gücünü və Bakı-Tehran xəttində yaranan yeni mühiti ətraflı şərh edib:
"Azərbaycan QHT-lərinin Prezident Məsud Pezeşkiana ünvanladığı açıq məktub rəsmi diplomatiyaya verilən mühüm ictimai dəstəkdir. Son illərdə yaşanan gərginliklərdən sonra Prezident İlham Əliyev və Prezident Pezeşkian arasında formalaşan qarşılıqlı hörmətə əsaslanan dialoq cəmiyyətdə də müsbət qarşılanır. Bu müraciətin əsas mesajı odur ki, Azərbaycan cəmiyyəti qarşıdurma ssenarisini deyil, mehriban qonşuluq siyasətini dəstəkləyir. Dövlətlər saziş imzalayır, etimadı isə xalqlar qurur. QHT-lərin bu addımı İran tərəfinə göstərir ki, Azərbaycanda dialoqa hazırlıq təkcə hökumət səviyyəsində deyil, ictimai səviyyədə də var. Bu, gələcəkdə münasibətləri pozmağa yönəlmiş təxribatlara qarşı ictimai immunitet yaradır".
Umud Mirzəyev vətəndaş cəmiyyətinin klassik diplomatiyanın çatmadığı sahələrdə oynaya biləcəyi rolu və birgə əməkdaşlıq imkanlarını diqqətə çatdırıb:
"QHT-lər siyasi dialoqun inkişafına klassik diplomatiyanın edə bilmədiyi sahələrdə töhfə verə bilər. Bu, xalq diplomatiyası vasitəsilə Arazın və Xəzərin ekologiyası kimi birgə problemlər ətrafında forumlar təşkil etməklə, iki ölkə arasında münasibətləri pozmağa çalışan dezinformasiyaya qarşı birgə mübarizə aparmaqla, mədəniyyət və humanitar sahələrdə körpülər qurmaqla mümkün ola bilər. Bu müraciət Azərbaycan vətəndaş cəmiyyətinin yetkinləşdiyini və xarici siyasətin ictimai dayağına çevrildiyini göstərir. İran və Azərbaycan tarix, mədəniyyət və din baxımından ən yaxın qonşulardır; bizi ayıran məqamlar süni, birləşdirən bağlar isə təbiidir. QHT-lərin vəzifəsi də məhz bu təbii bağları gücləndirməkdir".
Zeynəb Həsən
15:30 27.10.2026
Oxunuş sayı: 79
