Polşada hakimiyyət uğrunda mübarizə: Konstitusiya böhranı ölkəni hara aparır?
Polşada Konstitusiya Məhkəməsi ətrafında yaranan qarşıdurma ölkədə siyasi gərginliyi daha da artırıb. Hakimiyyət və müxalifət arasında dərinləşən fikir ayrılıqları artıq dövlət institutlarının fəaliyyətinə və siyasi sabitliyə təsir göstərən ciddi mübahisəyə çevrilib. Tərəflərin bir-birini xarici qüvvələrin təsirində olmaqda ittiham etməsi isə vəziyyətə geosiyasi rəqabət müstəvisindən də yanaşmağı zəruri edir. Bəs Polşada hazırkı qarşıdurmaya hansı amillər zəmin yaradıb? Bu proseslər hakimiyyət böhranına, yoxsa daha geniş siyasi qarşıdurmaya gətirib çıxara bilər? Polşanı qarşıda nələr gözləyir?
Mövzu ilə bağlı politoloq Məhəmməd Əsədullazadə Crossmedia.az-a açıqlamasında qeyd edib ki, Polşada Konstitusiya Məhkəməsi ətrafında baş verənlər, bir növ, hakimiyyət daxilindəki mübarizənin nəticəsidir: “Təbii ki, burada hökumət Rusiyanı, müxalifət isə Almaniyanı günahlandırır. Eyni zamanda, bu məsələdə geosiyasi rəqabət amili də mövcuddur. Polşa Almaniya və Şərqi Avropa ilə bağlı geosiyasi rəqabətin mərkəzində yerləşir. Baş nazir Donald Tuskun rəhbərlik etdiyi hökumət Konstitusiya Məhkəməsini tam nəzarətə götürməyə çalışır. Bununla da dövlət idarəçiliyində öz səlahiyyətlərini və təsir imkanlarını tamamilə genişləndirmək istəyir”.
Politoloq qeyd edib ki, lakin Prezident buna qarşıdır: “Düşünürəm ki, bu qarşıdurma növbəti mərhələdə Polşada müəyyən konstitusiya böhranına gətirib çıxara bilər. Çünki baş verənlər ölkədə daxili siyasi sabitliyi təhdid edir. Bu vəziyyət isə Rusiyanın maraqlarına uyğundur. Nəzərə alsaq ki, gələcəkdə geosiyasi rəqabət meydanına çevrilən Şərqi Avropada, həm Ukraynada, həm də Qərbi Avropanın digər istiqamətlərində, eləcə də Polşada siyasi sabitliyin təhdid olunması Rusiya üçün əlavə imkanlar yarada bilər. Eyni zamanda, bu proseslər Avropa İttifaqı daxilində də müəyyən problemlərə gətirib çıxara bilər. Avropa İttifaqı da çalışacaq ki, Polşada baş verən proseslərə yalnız siyasi yollarla müdaxilə etsin və yaranmış məsələnin ölkə daxilində danışıqlar yolu ilə həllinə nail olsun”.
Ayhan
20:30 02.11.2026
Oxunuş sayı: 57
