ABŞ İraqdan çıxır: Vaşinqton missiyasını başa çatdırdı, yoxsa...
ABŞ İraqdakı son hərbi bazalarından da çıxmağa hazırlaşır. Vaşinqtonun ölkədəki hərbi mövcudluğu 2003-cü ildə İraqın işğalı ilə başlayıb, əsas qoşunlar 2011-ci ilin sonunda ölkədən çıxarılıb. Lakin 2014-cü ildə İŞİD-in genişlənməsi fonunda ABŞ qüvvələri beynəlxalq koalisiya çərçivəsində İraqa geri qayıdıb. Hazırkı çıxışla ABŞ-ın İraqdakı iki onillikdən çox davam edən hərbi iştirakı yeni mərhələyə keçir. ABŞ qüvvələrinin çıxarılması İraqda təhlükəsizlik məsuliyyətinin daha böyük hissəsinin yerli qüvvələrin üzərinə keçməsi ilə yanaşı, ölkənin ABŞ və İran arasında balans siyasəti baxımından da diqqət çəkir. Reuters-in məlumatına görə, bəzi iraqlı təhlükəsizlik rəsmiləri ABŞ-nin çıxışının İŞİD-in yuxu hüceyrələrinin yenidən fəallaşması üçün imkan yarada biləcəyindən narahatdır. Eyni zamanda İran və ona yaxın qruplar ABŞ qüvvələrinin ölkədən çıxmasını özləri üçün mühüm hadisə kimi qiymətləndirirlər.
Mövzu ilə bağlı Crossmedia.az-a açıqlama verən politoloq Fikrət Sadıqov bildirib ki, ABŞ-ın İraqa hərbi müdaxiləsinin əsas məqsədlərindən biri terrorla mübarizə çərçivəsində müəyyən qüvvələri zərərsizləşdirmək olub:
"Ştatlar vaxtilə qoşunları ona görə İraqa yeridib ki, terrora qarşı mübarizə çərçivəsində müəyyən qüvvələri neytrallaşdırsın, məhv etsin və aradan götürsün. Bu, 2011-ci ildə idi, sonradan – bundan əvvəl deyil – 2003-cü ildə Nyu-Yorkda baş verən məlum hadisələrdən, terror aktından sonra. Sonradan onlar o qoşunların sayını müəyyən dərəcədə ixtisara saldı, amma yenə də orada minlərlə qoşun qalırdı. Mən düşünürəm ki, onlar öz missiyasını yerinə yetiriblər. Yəni artıq hökumət də dəyişib, Səddam Hüseyn də edam olunub, siyasi rejim artıq digər siyasi fiqurlar tərəfindən idarə olunur və eyni zamanda İŞİD-ə də son qoyulub, orada İŞİD-lə bağlı mübarizə gedirdi".
Politoloq qeyd edib ki, eyni zamanda burada digər həqiqət də var. Çünki onlar başa düşür ki, ABŞ-nin İranla bağlı mübarizəsi hələ davam edəcək. Çünki bunu dəfələrlə ABŞ prezidenti bəyan edib və İran da bəyan edib ki, onlar Amerikanın Yaxın Şərqdəki infrastrukturlarına, hərbi bazalarına zərbə vuracaqlar. Ona görə bunu nəzərə alaraq, çox güman ki, təhlükəsizlik naminə Vaşinqton belə bir qərar qəbul edib və əsas oradakı qoşunlarını çıxarmaq fikrindədir və çıxardı. Amma orada müəyyən qrup silahlı amerikalılar hələ qalacaq. Onlar, düzdür, açıq şəkildə münaqişələrdə iştirak etməyəcək, amma müəyyən qoruyucu funksiyaları yerinə yetirəcək.
Zeynəb Həsən
20:20 29.09.2026
Oxunuş sayı: 44
