Xarici xəbərlər

Putin: Rusiya və Ukrayna arasında danışıqların bərpası mümkündür

Rusiya Prezidenti Vladimir Putin Rusiya, ABŞ və Ukrayna arasında üçtərəfli danışıqların yenidən başlanmasının mümkün olduğunu, lakin Moskvanın bundan sonra atacağı addımları öz maraqları əsasında müəyyənləşdirəcəyini bildirib.

Crossmedia.az xəbər verir ki, “TASS” bu barədə məlumat yayıb.

Putin Sankt-Peterburq Beynəlxalq Birləşmiş Mədəniyyətlər Forumunun 12-ci sessiyasından sonra keçirdiyi mətbuat konfransında İstanbulda keçirilən danışıqlar prosesinin Ukrayna tərəfinin təşəbbüsü ilə dayandırıldığını deyib.

Rusiya lideri bildirib ki, Ukrayna sentyabrın 18-20-də keçirilən seçkilər zamanı Moskvaya və seçki məntəqələrinə pilotsuz uçuş aparatları ilə hücumlar həyata keçirib. Onun sözlərinə görə, iyun ayından etibarən Rusiyadakı neft emalı zavodlarına da hücumlar edilib.

Putin həmçinin Ukraynanın Qara dənizdə blokada yaratmağa çalışdığını və 100-dən çox gəminin zərər gördüyünü iddia edib. Onun sözlərinə görə, zərərçəkən gəmilər arasında həm Rusiya, həm də xarici bayraqlı gəmilər olub.

Rusiya Prezidenti Moskvanın bu hücumlara sərt cavab verməyə başladığını bildirib. O, enerji və hava məkanına qarşı hücumların qarşılıqlı dayandırılması məsələsinin gündəmə gəldiyini qeyd edib və bunun Ukrayna tərəfinin əvvəlki addımlarından sonra baş verdiyini vurğulayıb.

Putin danışıqların bərpası ilə bağlı təklifin masada qaldığını bildirib. O qeyd edib ki, kompromisə yönəlmiş addımların atılması və danışıqlar prosesinin yenidən başlanması mümkündür.

Rusiya liderinin sözlərinə görə, Moskva bu istiqamətdə bütün qərarları ölkənin maraqlarını nəzərə alaraq qəbul edəcək.

Mövzular:

Rusiya ABŞ Ukrayna Qara dəniz Beynəlxalq Birləşmiş Mədəniyyətlər Forumu Sankt-Peterburq Vladimir Putin

🖨 Çap et

02:55 26.09.2026

Oxunuş sayı: 40