Xarici xəbərlər

Türkiyə, Səudiyyə Ərəbistanı və Pakistan müdafiə əməkdaşlığını gücləndirir

Türkiyə, Səudiyyə Ərəbistanı və Pakistan müdafiə əməkdaşlığı çərçivəsində yeni mexanizmlərin yaradılması və regional təhlükəsizlik məsələlərini müzakirə edib.

Crossmedia.az xəbər verir ki, Türkiyə Xarici İşlər Nazirliyi bu barədə məlumat yayıb.

Türkiyənin xarici işlər naziri Hakan Fidan, Səudiyyə Ərəbistanının xarici işlər naziri Feysəl bin Fərhan və Pakistanın xarici işlər naziri Məhəmməd İshaq Dar Nyu-Yorkda Məkkə Birgə Müdafiə Sazişi çərçivəsində görüş keçirib.

Görüşdə saziş əsasında Baş Katibliyin, komitələrin və işçi qruplarının yaradılması istiqamətində əldə olunan irəliləyiş və onların fəaliyyətə başlaması üçün görülən hazırlıqlar nəzərdən keçirilib.

Nazirlər müqəddəs Məkkə şəhərinə, eləcə də Səudiyyə Ərəbistanının mülki və iqtisadi obyektlərinə qarşı həyata keçirilən hücumları qətiyyətlə pisləyib. Onlar Səudiyyə Ərəbistanı Silahlı Qüvvələrinin hazırlıq səviyyəsini və ölkənin təhlükəsizliyini müdafiə etmək imkanlarını yüksək qiymətləndiriblər.

Nazirlər BMT Nizamnaməsinin 51-ci maddəsinə əsasən Səudiyyə Ərəbistanının təhlükəsizliyini müdafiə etmək üçün uyğun hesab etdiyi tədbirləri görmək hüququnu bir daha təsdiqləyiblər.

Bildirilib ki, Məkkə Birgə Müdafiə Sazişinə əsasən tərəflərdən hər hansı birinə qarşı hücum bütün tərəflərə qarşı hücum kimi qiymətləndirilir. Bu çərçivədə Səudiyyə Ərəbistanına dəstəyin göstərilməsi yollarını müzakirə etmək üçün üç ölkənin Baş Qərargah rəislərinin təcili görüşünün keçirilməsi ilə bağlı hazırlıqlar da müzakirə olunub.

Tərəflər regiondakı mövcud vəziyyətə toxunaraq beynəlxalq hüquqa, mehriban qonşuluq münasibətlərinə, dövlətlərin suverenliyinə qarşılıqlı hörmət və daxili işlərə müdaxilə etməmək prinsiplərinə riayət olunmasının vacibliyini vurğulayıblar. Həmçinin dəniz nəqliyyatının təhlükəsizliyi və azadlığının təmin edilməsinin əhəmiyyəti qeyd olunub.

Nazirlər regionda davamlı sülh və sabitliyin təmin olunması, gərginliyin azaldılması səylərinin dəstəklənməsi və böhranların sülh yolu ilə həllinin təşviq edilməsi istiqamətində birgə fəaliyyətə sadiq olduqlarını bildiriblər.

Mövzular:

Türkiyə Səudiyyə Ərəbistan Pakistan Türkiyə Xarici İşlər Nazirliyi Məkkə şəhəri işçi qrupları

🖨 Çap et

01:15 26.09.2026

Oxunuş sayı: 35