Anım Günü: Şəhidlərimizin əziz xatirəsinə dərin ehtiram
Hər il sentyabrın 27-si Azərbaycan xalqı üçün xüsusi bir gündür. Bu tarix 2020-ci ildə başlayan Vətən müharibəsinin başlanğıcı və eyni zamanda qəhrəman şəhidlərimizin əziz xatirəsinə ehtiram günüdür.
2020-ci il sentyabrın 27-də Ermənistanın növbəti hərbi təcavüzünə cavab olaraq Azərbaycan Respublikasının Silahlı Qüvvələri Ali Baş Komandan İlham Əliyevin rəhbərliyi altında işğal altındakı torpaqların azad edilməsi uğrunda əks-hücuma keçdi. 44 gün davam edən Vətən müharibəsi xalqımızın iradəsi, birliyi və ordumuzun qəhrəmanlığı sayəsində tarixi Zəfərlə başa çatdı. Otuz ilə yaxın işğal altında qalan torpaqlarımız azad edildi, ərazi bütövlüyümüz bərpa olundu.
Bu müqəddəs savaşda minlərlə oğul və qızımız Vətən uğrunda canını fəda etdi. Prezident İlham Əliyevin 2 dekabr 2020-ci il tarixli Sərəncamına əsasən hər il sentyabrın 27-si Azərbaycanda Anım Günü kimi qeyd olunur. Bu gün Vətən müharibəsində qəhrəmancasına döyüşmüş, Azərbaycan bayrağını azad edilən torpaqlarda dalğalandırmış bütün şəhidlərimizə dərin ehtiramın ifadəsidir.
Anım Günündə bütün ölkə boyu şəhidlərin məzarları ziyarət edilir, Şəhidlər xiyabanlarında və memoriallarda gül dəstələri qoyulur, dualar oxunur. Saat 12:00-da ölkə ərazisində bir dəqiqəlik sükut elan olunur. Bu sükut şəhidlərimizin ruhuna ehtiram, onların fədakarlığına minnətdarlıq və xatirələrinin əbədi yaşayacağına inam deməkdir.
Şəhidlərimiz yalnız döyüş meydanında deyil, xalqımızın qəlbində də zəfər qazandılar. Onların qanı bahasına azad edilən torpaqlarda bu gün həyat yenidən canlanır, şəhərlər və kəndlər bərpa olunur, üçrəngli bayrağımız əbədi dalğalanır. Bu, şəhidlərimizin vəsiyyətinə ən böyük sadiqlikdir.
Allah bütün şəhidlərimizə rəhmət eləsin!
Ruhları şad, məkanları cənnət olsun!
Vətən sağ olsun!
Nigar Xəlilli
15:17 23.09.2026
Oxunuş sayı: 42
